ᥟᥣᥭᥲ ᥓᥣᥒ ᥚᥦᥖ
ᥛᥤᥰ ᥕᥣ ᥗᥝᥲ ᥐᥨᥝᥳ ᥘᥫᥒ ᥖᥫᥳ ᥟᥣᥭᥲ ᥓᥣᥒ ᥚᥦᥖ ᥝᥣ：“ᥟᥣᥭᥲ，ᥙᥫᥢ ᥝᥣ ᥛᥬᥰ ᥓᥣᥒ ᥚᥦᥖ，ᥛᥬᥰ ᥓᥣᥛᥰ ᥚᥦᥖ ᥞᥬᥲ ᥐᥝ ᥙᥩᥰ ᥕᥧᥛᥱ ᥘᥧ。”
ᥘᥭᥲ ᥞᥦᥴ ᥘᥣᥭᥴ ᥝᥢᥰ，ᥕᥣ ᥗᥝᥲ ᥐᥨᥝᥳ ᥘᥭᥳ ᥙᥩᥰ ᥘᥪᥛᥰ ᥑᥣᥛᥰ ᥛᥢᥰ ᥝᥣ ᥘᥢᥳ ᥞᥝᥳ，ᥟᥣᥭᥲ ᥓᥣᥒ ᥚᥦᥖ ᥛᥩᥐᥱ ᥝᥣ：“ᥕᥣ，ᥐᥨᥙᥱ ᥐᥤᥢ ᥘᥫᥢ ᥞᥝᥳ，ᥟᥝ ᥛᥨᥝᥲ ᥟᥩᥛ ᥖᥣᥒᥱ ᥞᥨᥝᥴ ᥛᥬᥰ ᥛᥣᥰ ᥚᥣᥭᥴ ᥚᥣᥭᥴ ᥘᥦᥰ。”
ᥕᥣ ᥗᥝᥲ ᥐᥨᥝᥳ ᥘᥭᥳ ᥗᥣᥒᥱ ᥝᥣ ᥖᥥᥳ，ᥚᥤ ᥚᥣ ᥟᥝ ᥛᥨᥝᥲ ᥟᥩᥛ ᥖᥣᥒᥱ ᥞᥨᥝᥴ ᥛᥢᥰ ᥟᥩᥐᥱ ᥟᥫᥢᥰ ᥛᥣᥰ，ᥗᥣᥛᥴ ᥝᥣ：“ᥘᥬ，ᥕᥧᥱ ᥗᥬᥴ ᥞᥭᥳ？”
ᥟᥣᥭᥲ ᥓᥣᥒ ᥚᥦᥖ ᥑᥣᥢᥴ ᥝᥣ：“ᥘᥣᥢᥳ，ᥞᥦᥢᥴ ᥖᥨᥭᥰ ᥐᥣᥱ ᥘᥦᥰ。”
ᥛᥢᥰ ᥞᥧᥳ ᥞᥦᥢᥴ ᥞᥨᥝᥴ，ᥛᥨᥝᥲ ᥟᥩᥛ ᥓᥝᥱ ᥘᥧᥐ ᥘᥫᥴ ᥞᥨᥝᥴ ᥛᥢᥰ ᥖᥨᥐᥱ ᥛᥣᥰ ᥘᥦᥝᥴ ᥞᥝᥳ。
“ᥟᥣ ᥘᥨᥝᥰ! ᥛᥨᥝᥲ ᥟᥩᥛ ᥐᥝ ᥘᥦᥝᥴ ᥞᥝᥳ ᥔᥣ。”
“ᥟᥫᥴ，ᥛᥬᥰ ᥘᥥᥴ ᥞᥬᥲ ᥐᥝ ᥚᥦᥖ ᥛᥬᥰ ᥙᥨᥝᥰ ᥕᥧᥛᥱ ᥟᥛᥱ ᥓᥬ ᥘᥭᥴ？”
(ᥛᥭᥴ ᥑᥛᥰ ᥛᥧᥒᥳ ᥓᥥᥙᥱ ᥞᥩᥛᥴ)