ᥞᥩᥭᥰ ᥖᥤᥢ ᥚᥣᥰ ᥘᥣᥰ
ᥛᥫ ᥓᥝᥳ ᥘᥢᥳ，ᥛᥤᥰ ᥞᥨᥝᥴ ᥑᥛᥰ ᥛᥫᥒᥰ ᥘᥫᥒ ᥚᥣᥐ ᥛᥣᥢᥲ ᥕᥣᥢᥴ ᥞᥨᥝᥴ ᥛᥣᥰ ᥗᥪᥒᥴ ᥘᥤᥱ ᥙᥣᥒᥱ，ᥘᥭᥲ ᥞᥢᥴ ᥛᥣᥝᥱ ᥟᥩᥢᥱ ᥐᥨᥝᥳ ᥘᥫᥒ，ᥞᥣᥒ ᥘᥤ ᥔᥨᥝᥰ ᥙᥨᥝᥰ，ᥖᥣ ᥑᥩᥢᥰ ᥖᥩᥢᥰ ᥖᥣᥒᥱ。ᥗᥢᥱ ᥞᥬᥲ ᥞᥨᥝᥴ ᥑᥛᥰ ᥐᥥᥐ ᥕᥧᥱ ᥘᥬᥰ ᥓᥬ，ᥓᥝᥱ ᥐᥣᥱ ᥖᥫᥳ ᥛᥣᥝᥱ ᥐᥩᥢᥱ ᥐᥨᥝᥳ ᥘᥭᥳ ᥑᥭ ᥘᥩᥒ ᥖᥣᥐ ᥖᥣᥒᥰ ᥟᥣᥢᥰ ᥛᥢᥰ。ᥐᥩᥙ ᥙᥫ ᥞᥨᥝᥴ ᥑᥛᥰ ᥕᥒ ᥛᥤᥰ ᥘᥧᥐ ᥛᥣᥰ ᥔᥪᥙ ᥞᥩᥭᥰ ᥖᥩᥭᥰ ᥒᥫᥢ ᥗᥤᥒᥰ ᥙᥫᥒᥱ ᥖᥫᥒᥰ ᥐᥣᥰ，ᥛᥢᥰ ᥑᥬᥲ ᥞᥬᥲ ᥛᥣᥝᥱ ᥟᥩᥢᥱ ᥐᥨᥝᥳ ᥘᥭᥳ ᥐᥣᥱ ᥞᥥᥖᥱ ᥑᥧᥢᥴ ᥑᥨᥭᥴ ᥐᥦᥛ ᥛᥫᥒᥰ，ᥙᥧᥖ ᥙᥫᥒᥱ ᥙᥣᥱ ᥘᥣᥒᥱ ᥓᥝᥲ ᥞᥨᥝᥴ ᥑᥛᥰ。ᥐᥩᥭᥰ ᥝᥣ ᥛᥣᥝᥱ ᥘᥨᥝᥳ ᥘᥭᥳ ᥕᥒ ᥟᥫᥰ。ᥙᥦᥐ ᥝᥣ ᥙᥣᥝᥱ ᥐᥨᥝᥳ ᥘᥭᥳ ᥕᥒ ᥟᥫᥰ ᥑᥣᥒᥰ，ᥞᥨᥝᥴ ᥑᥛᥰ ᥞᥪᥴ ᥐᥩᥲ ᥖᥤᥴ ᥞᥬᥲ ᥛᥢᥰ ᥑᥝᥲ ᥞᥨᥝᥴ ᥐᥣᥱ ᥞᥥᥖᥱ ᥑᥨᥭᥴ ᥐᥦᥛ ᥛᥫᥒᥰ。ᥞᥨᥝᥴ ᥑᥛᥰ ᥙᥩᥐ ᥑᥪᥢᥰ ᥑᥨᥝᥴ ᥞᥦᥴ，ᥞᥩᥒᥳ ᥐᥨᥢᥰ ᥞᥦᥢᥰ ᥟᥝ ᥑᥫᥒ ᥘᥧᥒ ᥑᥫᥒ ᥛᥭ ᥞᥭᥱ ᥐᥩᥒ ᥞᥭᥱ ᥛᥩᥒᥰ ᥞᥦᥴ ᥛᥣᥰ ᥞᥙ ᥛᥢᥰ。ᥐᥨᥢᥰ ᥘᥬᥰ ᥛᥣᥢᥲ ᥘᥭᥲ ᥒᥤᥢᥰ ᥔᥥᥴ，ᥚᥬᥴ ᥖᥨᥝ ᥑᥬᥲ ᥞᥢᥴ ᥞᥣᥒ ᥛᥣᥝᥱ ᥟᥩᥢᥱ ᥐᥨᥝᥳ ᥘᥭᥳ，ᥓᥝᥱ ᥟᥩᥢ ᥐᥢ ᥓᥩᥛᥰ ᥛᥣᥰ ᥙᥥᥢ ᥜᥧᥒᥴ ᥙᥥᥢ ᥓᥥ，ᥗᥢᥱ ᥞᥬᥲ ᥞᥨᥝᥴ ᥑᥛᥰ ᥓᥬ ᥕᥫᥰ ᥑᥩᥢᥰ ᥘᥨᥒᥴ ᥘᥣᥒᥴ。ᥛᥣᥝᥱ ᥟᥩᥢᥱ ᥐᥨᥝᥳ ᥘᥭᥳ ᥖᥫᥳ ᥐᥨᥢᥰ ᥖᥒᥰ ᥘᥣᥭᥴ ᥝᥣ；“ᥓᥣᥖ ᥘᥭᥳ ᥐᥝᥕᥒ ᥑᥬᥲ ᥙᥥᥢ ᥞᥫᥢᥰ ᥙᥥᥢ ᥕᥥᥰ，ᥙᥩᥰ ᥝᥣ ᥔᥧᥴ ᥟᥛᥱ ᥘᥪᥛᥰ ᥘᥭᥲ ᥐᥝ，ᥓᥝᥱ ᥞᥬᥲ ᥞᥩᥭᥰ ᥖᥤᥢ ᥐᥝ ᥕᥧᥱ ᥖᥫᥳ ᥔᥧᥴ ᥐᥣᥱ ᥖᥒᥰ ᥞᥪᥒᥴ ᥖᥒᥰ ᥞᥤᥰ ᥘᥦᥰ。”ᥑᥪᥐᥴ ᥑᥣᥐᥴ ᥐᥛᥰ ᥘᥫᥒ ᥘᥫᥴ ᥞᥤᥢᥴ ᥙᥣᥒ ᥘᥣᥲ ᥞᥨᥝᥴ ᥑᥛᥰ ᥘᥢᥳ ᥙᥨᥝᥱ ᥟᥩᥐᥱ ᥞᥩᥭᥰ ᥖᥤᥢ ᥛᥣᥰ，ᥛᥣᥝᥱ ᥞᥩᥢᥱ ᥐᥨᥝᥳ ᥘᥢᥳ ᥐᥩᥰ ᥞᥣᥭᥴ ᥖᥣ ᥐᥣᥱ ᥐᥛᥰ ᥘᥥᥝ ᥞᥝᥳ。ᥞᥩᥭᥰ ᥖᥤᥢ ᥘᥭᥳ，ᥖᥣᥒᥰ ᥕᥣᥝᥰ ᥛᥤᥰ ᥑᥫ ᥔᥩᥒᥴ ᥛᥭᥳ。ᥖᥬᥲ ᥞᥤᥢᥴ ᥔᥛᥳ ᥙᥧᥢᥰ ᥟᥩᥐᥱ ᥘᥛᥳ ᥙᥧᥒᥱ ᥛᥣᥰ ᥔᥩᥒᥴ ᥘᥩᥒᥴ，ᥛᥦᥒᥱ ᥘᥩᥒᥴ ᥖᥬᥲ ᥖᥒᥰ ᥘᥩᥒᥴ ᥘᥫᥴ。
ᥝᥣᥭᥰ ᥘᥒᥴ ᥛᥣᥰ ᥛᥤᥰ ᥕᥣ ᥛᥧᥰ ᥔᥫᥰ ᥐᥨᥝᥳ ᥘᥫᥒ ᥛᥣᥰ ᥔᥐ ᥔᥤᥢᥲ ᥖᥤ ᥘᥬᥰ ᥘᥩᥒᥴ ᥙᥧᥒᥱ ᥘᥭᥳ，ᥔᥛᥳ ᥞᥝ ᥔᥤᥢᥲ ᥛᥢᥰ ᥖᥣᥒᥱ ᥘᥫᥴ ᥞᥤᥢᥴ ᥘᥢᥳ，ᥞᥤᥢᥴ ᥞᥨᥭᥱ ᥘᥭᥳ ᥓᥧᥰ ᥞᥥᥲ ᥐᥣᥱ ᥖᥣᥱ ᥗᥪᥒᥴ ᥛᥫ ᥘᥭᥳ。
ᥓᥨᥝ ᥞᥪᥒᥴ ᥐᥣᥝᥰ ᥕᥣᥝᥰ ᥛᥣᥰ，ᥐᥨᥢᥰ ᥛᥫᥒᥰ ᥖᥩ ᥛᥣᥖ ᥝᥣ ᥞᥩᥭᥰ ᥖᥤᥢ ᥘᥭᥳ ᥙᥥᥢ ᥞᥩᥭᥰ ᥖᥤᥢ ᥚᥣᥰ ᥘᥣᥰ，ᥛᥫ ᥘᥭᥳ ᥕᥒᥰ ᥛᥤᥰ ᥕᥧᥱ ᥖᥤ ᥘᥤᥱ ᥙᥣᥒᥱ ᥞᥭᥳ。
ᥛᥭᥴ ᥑᥛᥰ ᥛᥧᥒᥳ ᥓᥥᥙᥱ ᥞᥩᥛᥴ