ᥙᥣᥭᥰ ᥛᥩᥢᥰ
ᥙᥣᥭᥰ ᥛᥩᥢᥰ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]
ᥙᥣᥭᥰ ᥛᥩᥢᥰ ᥟᥢ ᥝᥣ ᥘᥭᥳ ᥙᥥᥢ ᥚᥣᥒᥴ ᥞᥣᥒ ᥘᥩᥒ ᥕᥥᥢᥱ ᥒᥥ ᥐᥨᥢᥰ ᥘᥫᥒ ᥑᥫᥰ ᥕᥝᥳ။ ᥖᥨᥭᥰ ᥞᥢᥴ ᥘᥩᥒ ᥕᥥᥢᥱ ᥒᥥ ᥐᥨᥢᥰ ᥑᥫᥰ ᥘᥢᥳ ᥔᥥᥴ ᥘᥩᥒ ᥝᥭᥳ ᥝᥣᥒᥰ ᥓᥬ ᥑᥝᥴ ᥛᥫᥢᥴ ᥞᥪᥴ၊ ᥘᥛᥳ ᥐᥖᥳ ᥑᥝᥴ ᥛᥤᥰ ᥘᥒᥱ ᥞᥪᥴ၊ ᥓᥣ ᥘᥦᥐ ᥑᥝᥴ ᥙᥥᥢ ᥞᥪᥴ၊ ᥘᥩᥒ ᥕᥧᥱ ᥔᥝᥰ ᥐᥤᥢ ᥔᥣᥒᥲ ᥑᥝᥴ ᥛᥤᥰ ᥓᥢᥳ ᥘᥬ ᥘᥭᥴ ᥐᥩᥲ ᥘᥣᥛᥰ ᥞᥧᥳ ᥘᥭᥲ ᥕᥧᥱ။ ᥚᥧᥱ ᥛᥤᥰ ᥙᥪᥢᥳ ᥞᥧᥳ ᥑᥝᥴ ᥛᥣᥒᥴ ᥓᥫᥰ ᥖᥥᥳ ᥝᥣ ᥝᥭᥳ ᥙᥣᥭᥰ ᥛᥩᥢᥰ ᥘᥭᥳ ᥛᥢᥰ ᥕᥒᥰ ᥘᥥᥴ ᥙᥢ ᥘᥭᥲ ᥖᥣᥒᥰ ᥐᥖᥳ ᥑᥦᥢᥱ ᥑᥫᥰ ᥐᥨᥢᥰ ᥘᥫᥒ ᥑᥫᥰ ᥘᥫᥴ ᥔᥥᥴ ᥟᥢ ᥑᥝᥴ ᥞᥥᥖᥲ ᥔᥣᥒᥲ ᥘᥣᥲ ᥐᥣᥢ ᥑᥝᥴ ᥘᥢᥳ ᥑᥢᥴ ᥘᥭᥴ ᥕᥝᥳ ။
ᥙᥣᥭᥰ ᥛᥩᥢᥰ ᥟᥢ ᥝᥣ ᥘᥢᥳ ᥝᥣ ᥙᥩᥒᥱ ᥔᥒᥴ?
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]
ᥙᥣᥭᥰ ᥛᥩᥢᥰ ᥟᥢ ᥝᥣ ᥘᥢᥳ ᥙᥥᥢ ᥙᥦᥒᥱ ᥕᥣᥱ ᥟᥢ ᥓᥣᥒ ᥞᥥᥖᥱ ᥞᥬᥲ ᥐᥨᥢᥰ ᥞᥝᥰ ᥓᥬ ᥖᥪᥢᥱ ᥖᥥᥢᥲ ᥑᥩᥢᥰ ᥝᥭᥴ ᥕᥝᥳ။ ᥙᥥᥢ ᥙᥦᥒᥱ ᥕᥣᥱ ᥟᥢ ᥔᥨᥢᥰ ᥙᥢ ᥞᥬᥲ ᥓᥥᥱ ᥖᥢᥱ ᥘᥣᥱ ᥚᥧᥖᥱ ᥙᥨᥝᥱ ᥛᥣᥰ၊ ᥙᥥᥢ ᥙᥦᥒᥱ ᥕᥣᥱ ᥟᥢ ᥐᥨᥢᥰ ᥞᥝᥰ ᥝᥨᥢᥳ ᥔᥥᥴ ᥑᥨᥒ ᥟᥩᥐᥱ ᥙᥥᥢ ᥛᥣᥰ ᥔᥥᥴ ᥓᥫᥰ ᥟᥢ ᥘᥭᥲ ᥖᥨᥭᥰ ᥞᥢᥴ ᥘᥢᥳ ᥘᥭᥲ ᥛᥤᥰ ᥖᥣᥒᥰ ᥑᥧᥭᥳ ᥞᥢᥴ ᥓᥩᥛᥰ ᥘᥭᥲ ᥙᥥᥢ ᥖᥣᥒᥰ ᥞᥣᥢᥳ ᥓᥬ ᥓᥩᥛᥰ ᥕᥧᥱ။ ᥐᥩᥙ ᥘᥭᥴ ᥙᥣᥭᥰ ᥛᥩᥢᥰ ᥘᥭᥳ ᥘᥭᥲ ᥝᥣ ᥙᥥᥢ ᥘᥛᥳ ᥝᥣᥢᥴ ᥙᥦᥒᥱ ᥕᥣᥱ ᥘᥭᥴ ᥐᥩᥲ ᥟᥛᥱ ᥚᥤᥖᥴ။ ᥖᥤ ᥘᥬᥰ ᥚᥧᥢᥴ ᥘᥤᥐ ᥟᥣ ᥘᥒᥱ ᥐᥣᥱ ᥘᥢᥳ ᥘᥛᥳ ᥝᥣᥢᥴ ᥙᥦᥒᥱ ᥕᥣᥱ ᥟᥢ ᥝᥣ ᥘᥢᥳ ᥞᥨᥛᥴ ᥓᥨᥛᥰ၊ ᥑᥨᥝᥰ ᥑᥨᥛᥴ၊ ᥞᥣᥢᥳ ᥓᥬ၊ ᥟᥤᥴ ᥘᥧᥴ၊ ᥘᥤ ᥓᥒᥰ ᥘᥤ ᥛᥫᥱ၊ ᥓᥬ ᥑᥪᥢᥲ ᥛᥤᥰ ᥞᥦᥒᥰ ᥓᥬ၊ ᥖᥨᥐᥱ ᥓᥬ၊ ᥟᥣᥛᥰ၊ ᥘᥤᥛᥴ ᥛᥢᥲ ᥘᥭᥴ ᥔᥥᥴ ᥛᥤᥰ ᥐᥝᥲ ᥙᥫᥒ။ ᥐᥣᥙ ᥙᥣᥢ ᥕᥣᥛᥰ ᥘᥥᥝ ᥓᥝᥲ ᥙᥣᥭᥰ ᥓᥬ ᥑᥝᥴ ᥖᥥᥳ ᥝᥣ ᥝᥭᥳ ᥘᥩᥒ ᥑᥧᥭᥳ ᥞᥢ ᥖᥤ ᥓᥬ (ᥟᥣ ᥔᥣᥱ ᥟᥢ ᥙᥥᥢ ᥛᥣᥰ ᥖᥤ ᥓᥬ)ᥘᥭᥳ ᥛᥤᥰ ᥝᥭᥳ 14 ᥙᥫᥒ ᥘᥭᥴ ᥕᥧᥱ။ ᥙᥣᥭᥰ ᥛᥩᥢᥰ ᥟᥢ ᥝᥣ ᥘᥭᥳ ᥙᥥᥢ ᥙᥦᥒᥱ ᥕᥣᥱ ᥖᥣᥒᥰ ᥛᥨᥝᥴ ᥟᥝ ᥘᥩᥒ ᥟᥢ ᥙᥥᥢ ᥟᥢ ᥛᥤᥰ ᥝᥭᥳ ᥘᥬᥰ ᥓᥬ ᥘᥢᥳ ᥞᥥᥖᥱ ᥟᥩᥐᥱ ᥘᥥᥴ ᥞᥬᥲ ᥙᥫᥢ ᥞᥧᥳ ᥓᥩᥛᥰ ᥞᥢᥴ ᥓᥩᥛᥰ ᥕᥝᥳ။ ᥙᥣᥭᥰ ᥔᥣᥭ ᥘᥭᥳ ᥖᥥᥳ ᥐᥦᥐᥱ ᥚᥥᥴ ᥘᥥᥴ ᥞᥬᥲ ᥙᥫᥢ ᥞᥧᥳ ᥞᥢᥴ ᥘᥩᥒ ᥖᥣᥒᥰ ᥗᥣᥖ ᥔᥣᥱ ᥚᥣᥱ ᥝᥣᥳ ᥛᥢᥰ ᥕᥝᥳ။ ᥙᥣᥭᥰ ᥛᥩᥢᥰ ᥘᥭᥳ ᥖᥥᥳ ᥟᥝ ᥟᥢ ᥙᥥᥢ ᥘᥬᥰ ᥓᥬ ᥘᥢᥳ ᥟᥩᥐᥱ ᥘᥥᥴ ᥙᥫᥢ ᥞᥬᥲ ᥙᥫᥢ ᥞᥧᥳ ᥞᥢᥴ ᥙᥥᥢ ᥓᥩᥛᥰ ᥘᥢᥳ ᥕᥝᥳ။
ᥙᥦᥒᥱ ᥕᥣᥱ ᥙᥣᥭᥰ ᥛᥩᥢᥰ ᥟᥢ ᥝᥣ ᥘᥢᥳ ᥘᥩᥒ ᥖᥦᥛᥲ ᥞᥣᥒ၊ ᥘᥩᥒ ᥑᥦᥐᥴ ᥓᥥᥢ ᥞᥣᥒ၊ ᥘᥩᥒ ᥛᥨᥝᥴ ᥔᥩᥢᥰ ᥘᥨᥝᥱ ᥞᥧᥢᥱ ᥞᥣᥒ၊ ᥘᥩᥒ ᥐᥣᥲ ᥘᥩᥒ ᥝᥦᥢᥴ၊ ᥘᥩᥒ ᥘᥤᥐ ᥘᥣᥭᥰ ᥓᥫᥰ ᥘᥭᥳ ᥐᥩᥲ ᥑᥝᥲ ᥙᥣᥰ ᥝᥭᥳ ᥕᥝᥳ။ ᥐᥨᥢᥰ ᥛᥫ ᥐᥩᥢᥱ ᥑᥝᥴ ᥘᥢᥳ ᥛᥫ ᥓᥝᥳ ᥑᥝᥴ ᥟᥝ ᥖᥩᥒᥴ ᥐᥣᥙᥱ ᥘᥣᥴ ᥑᥦᥙᥴ ᥛᥣᥐᥱ ᥞᥤᥢᥴ ᥓᥫᥰ ᥘᥭᥳ ᥔᥥᥴ ᥞᥥᥖᥱ ᥙᥥᥢ ᥖᥤ ᥔᥬᥱ ᥐᥤᥢ ᥖᥣᥒᥰ ᥐᥤᥢ ᥑᥝᥴ ᥕᥝᥳ။ ᥝᥣᥭᥰ ᥛᥣᥰ ᥞᥥᥖᥱ ᥙᥥᥢ ᥝᥣᥢᥱ ᥛᥣᥐᥱ ᥞᥤᥢᥴ ᥞᥥᥖᥱ ᥙᥥᥢ ᥝᥣᥢᥱ ᥘᥤᥢ ᥔᥥᥴ ᥕᥧᥒᥱ ᥖᥪᥰ ᥛᥣᥰ။ ᥙᥫᥱ ᥝᥣ ᥘᥭᥲ ᥞᥧᥳ ᥘᥩᥐᥱ ᥘᥣᥭᥰ ᥕᥧᥒᥱ ᥖᥪᥰ ᥞᥥᥐᥱ ᥘᥥᥐᥴ ᥖᥩᥒᥰ ᥓᥫᥰ ᥘᥭᥳ ᥛᥣᥰ ᥐᥩᥲ ᥟᥝ ᥓᥫᥰ ᥘᥭᥳ ᥟᥩᥒᥱ ᥔᥥᥴ ᥞᥥᥖᥱ ᥙᥥᥢ ᥑᥫᥒ ᥕᥤᥙᥱ ᥑᥫᥒ ᥖᥪᥰ ᥑᥝᥴ ᥛᥣᥰ။ ᥝᥣᥭᥰ ᥛᥣᥰ ᥑᥫᥒ ᥕᥤᥙᥱ ᥑᥫᥒ ᥖᥪᥰ ᥑᥝᥴ ᥘᥢᥳ ᥘᥒᥱ ᥞᥪᥴ ᥖᥤᥴ ᥘᥤ ᥕᥥᥛᥲ ᥘᥤ ᥖᥨᥭᥰ ᥐᥩᥲ ᥛᥨᥝᥴ ᥑᥨᥒ ᥔᥣᥒᥲ ᥞᥥᥖᥱ ᥛᥣᥰ ᥓᥩᥛᥰ ᥘᥒᥱ ᥐᥣᥒ ᥓᥬ ᥑᥝᥴ ᥑᥬᥲ ᥙᥥᥢ ᥘᥢᥳ ᥕᥧᥱ။ ᥘᥧᥐ ᥖᥤ ᥘᥢᥳ ᥔᥥᥴ ᥛᥤᥰ ᥛᥣᥰ ᥘᥩᥒ ᥞᥣᥢᥳ ᥓᥬ ᥘᥫᥴ ᥑᥨᥝᥰ ᥑᥩᥒᥴ ᥞᥣᥒ ᥘᥤ ᥑᥝᥴ ᥔᥥᥴ ᥘᥒᥱ ᥞᥪ ᥙᥨᥝᥰ ᥖᥤᥴ ᥞᥣᥢᥳ ᥓᥬᥴ ᥘᥫᥴ ᥘᥢᥳ ᥘᥩᥒ ᥞᥥᥖᥱ ᥑᥨᥝᥰ ᥑᥩᥒᥴ ᥑᥝᥴ ᥐᥩᥲ ᥑᥖᥱ ᥓᥬ ᥞᥥᥖᥱ ᥛᥣᥰ ᥞᥬᥲ ᥘᥣᥐᥱ ᥘᥣᥭᥰ ᥞᥬᥲ ᥞᥣᥒ ᥘᥤ ᥞᥬᥲ ᥑᥦᥛᥳ ᥘᥦᥙ ᥘᥦᥲ ᥐᥣᥢ ᥙᥣᥭᥰ ᥛᥩᥢᥰ ᥟᥢ ᥝᥣ ᥘᥢᥳ ᥒᥝᥲ ᥞᥣᥐ ᥛᥢᥰ ᥘᥧᥐ ᥖᥤ ᥘᥬᥰ ᥓᥬ ᥑᥨᥒ ᥟᥩᥐᥱ ᥔᥥᥴ ᥛᥣᥰ ᥘᥥᥴ ᥙᥢ ᥞᥣᥒ ᥚᥣᥒᥴ ᥖᥣᥒᥰ ᥘᥩᥐ ᥛᥢᥰ ᥘᥢᥳ ᥕᥝᥳ။
ᥘᥩᥒ ᥖᥦᥛᥲ ᥞᥣᥒ ᥜᥧᥒᥱ ᥑᥣᥱ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]
ᥘᥩᥒ ᥖᥦᥛᥲ ᥞᥣᥒ ᥘᥭᥳ ᥛᥤᥰ ᥛᥣᥰ ᥟᥩᥢ ᥖᥣᥒᥰ ᥛᥫ ᥐᥨᥢᥰ ᥞᥝᥰ ᥙᥭᥱ ᥛᥨᥝᥴ ᥖᥦᥛᥲ ᥘᥤᥐ ᥘᥢᥳ ᥕᥝᥳ။ ᥐᥨᥢᥰ ᥛᥫ ᥐᥩᥢᥱ ᥓᥝᥳ ᥓᥫᥰ ᥕᥧᥱ ᥘᥬᥰ ᥗᥛᥲ ᥘᥢᥳ ᥙᥦᥒᥴ ᥘᥒᥱ ᥑᥝᥴ ᥞᥢᥴ ᥔᥥᥴ ᥘᥬᥰ ᥓᥬ ᥑᥝᥴ ᥛᥤᥰ ᥘᥒᥱ ᥞᥪᥴ ᥘᥭᥴ ᥘᥢᥳ ᥑᥝᥴ ᥓᥒᥱ ᥟᥝ ᥘᥤᥢ ᥘᥦᥒ ᥘᥤᥢ ᥘᥛ ᥘᥤᥢ ᥑᥣᥝᥴ ᥗᥣᥢᥱ ᥛᥤ ᥓᥫᥰ ᥘᥭᥳ ᥔᥥᥴ ᥖᥦᥛᥲ ᥞᥣᥒ ᥝᥭᥳ ᥓᥩᥛᥰ ᥖᥤ ᥕᥧᥱ ᥑᥝᥴ ᥘᥢᥳ ᥕᥝᥳ။ ᥑᥥᥱ ᥑᥝᥴ ᥖᥥᥳ ᥝᥣ ᥞᥣᥒ ᥘᥫᥒ ᥞᥣᥒ ᥘᥭᥳ ᥔᥣᥱ ᥘᥫᥴ ᥔᥥᥴ ᥖᥨᥝ ᥘᥤᥐ ᥞᥥᥒᥴ ᥖᥨᥝ ᥘᥭᥴ ᥕᥝᥳ။ ᥘᥣᥭᥰ ᥖᥦᥛᥲ ᥞᥣᥒ ᥐᥨᥢᥰ ᥛᥫ ᥐᥩᥢᥱ ᥑᥝᥴ ᥘᥢᥳ ᥑᥝᥴ ᥖᥤᥴ ᥖᥦᥛᥲ ᥑᥣᥢᥱ ᥔᥥᥢᥲ ᥘᥥᥝ ᥔᥥᥴ ᥕᥩᥛᥳ ᥟᥣ ᥕᥩᥒᥱ ᥛᥢᥰ။ ᥝᥣᥭᥰ ᥛᥣᥰ ᥘᥩᥒ ᥕᥥᥢᥱ ᥒᥥ ᥑᥝᥴ ᥑᥪᥢᥲ ᥕᥬᥱ ᥛᥬᥱ ᥔᥧᥒᥴ ᥛᥣᥰ ᥔᥥᥴ ᥘᥣᥭᥰ ᥖᥦᥛᥲ ᥞᥣᥒ ᥑᥝᥴ ᥐᥩᥲ ᥑᥪᥢᥲ ᥕᥬᥱ ᥛᥬᥱ ᥔᥧᥒᥴ ᥛᥣᥰ ᥓᥩᥛᥰ ᥘᥦᥲ ᥘᥩᥒ ᥖᥦᥛᥲ ᥞᥣᥒ ᥘᥭᥳ ᥐᥩᥲ ᥙᥥᥢ ᥙᥣᥭᥰ ᥛᥩᥢᥰ ᥕᥝᥳ။
ᥛᥨᥝᥴ ᥑᥦᥐᥴ ᥛᥨᥝᥴ ᥓᥥᥢ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥙᥣᥭᥰ ᥛᥩᥢᥰ ᥟᥢ ᥐᥝᥱ ᥐᥥᥱ ᥗᥦᥒᥲ ᥟᥢ ᥘᥫᥒ ᥘᥭᥳ ᥖᥥᥳ ᥙᥥᥢ ᥛᥨᥝᥴ ᥑᥦᥐᥴ ᥛᥨᥝᥴ ᥓᥥᥢ ။ ᥛᥨᥝᥴ ᥑᥦᥐᥴ ᥛᥨᥝᥴ ᥓᥥᥢ ᥘᥭᥳ ᥑᥝᥴ ᥖᥥᥴ ᥖᥨᥭᥰ ᥞᥢᥴ ᥘᥧᥐ ᥟᥩᥢᥱ ᥟᥥᥢᥲ ᥘᥤᥢ ᥘᥥᥝᥴ ᥙᥢᥲ ᥞᥥᥖᥱ ᥙᥥᥢ ᥞᥣᥒ ᥚᥣᥒᥴ ᥔᥒᥴ ᥔᥤᥒᥴ ᥔᥥᥴ ᥓᥒᥱ ᥖᥥᥴ ᥖᥩᥒᥲ ᥑᥦᥐᥴ ᥙᥧᥖᥴ ᥛᥭᥳ၊ ᥒᥣᥰ ᥓᥣᥒᥳ၊ ᥘᥧᥐᥱ၊ ᥛᥣᥐᥱ ᥞᥤᥢᥴ၊ ᥛᥣᥐᥱ ᥟᥧᥖ ᥓᥫᥰ ᥘᥭᥳ ᥕᥝᥳ။ ᥘᥒᥱ ᥞᥪᥴ ᥛᥢᥰ ᥖᥤᥴ ᥘᥤ ᥕᥥᥛᥲ ᥘᥤ ᥖᥨᥭᥰ ᥙᥨᥝᥰ ᥒᥣᥭᥰ ᥛᥫᥢᥴ ᥘᥒᥱ ᥖᥨᥝ ᥛᥤᥰ ᥓᥬ ᥘᥢᥳ ᥑᥝᥴ ᥝᥨᥢᥳ ᥟᥩᥐᥱ ᥘᥬᥰ ᥓᥬ ᥔᥥᥴ ᥑᥦᥐᥴ ᥓᥥᥢ ᥞᥥᥖᥱ ᥙᥥᥢ ᥛᥣᥰ ᥞᥣᥒ ᥚᥣᥒᥴ ᥐᥧ ᥙᥫᥒ ᥙᥫᥒ ᥕᥧᥱ။
ᥛᥨᥝᥴ ᥖᥦᥛᥲ ᥞᥣᥒ ᥘᥢᥳ ᥛᥢᥰ ᥟᥝ ᥘᥛᥳ ᥕᥣᥲ ᥖᥦᥛᥲ ᥘᥥᥴ ᥙᥥᥢ ᥞᥣᥒ ᥚᥣᥒᥴ ᥖᥣᥒᥰ ᥕᥣᥝᥰ ᥖᥣᥒᥰ ᥙᥩᥖᥴ ᥛᥢᥰ ᥕᥝᥳ။ ᥛᥨᥝᥴ ᥑᥦᥐᥴ ᥛᥨᥝᥴ ᥓᥥᥢ ᥘᥭᥳ ᥖᥥᥳ ᥔᥛᥳ ᥘᥥᥴ ᥙᥢ ᥞᥣᥒ ᥚᥣᥒᥴ ᥟᥢ ᥘᥩᥛ ᥟᥢ ᥐᥨᥛ ᥙᥩᥰ ᥛᥫᥢᥴ ᥘᥒᥱ ᥖᥨᥝ ᥖᥥᥳ ᥔᥥᥴ ᥞᥬᥲ ᥓᥣᥒ ᥕᥤᥙᥱ ᥘᥭᥲ ᥘᥧᥙ ᥐᥛᥰ ᥘᥭᥲ ᥘᥢᥳ ᥕᥝᥳ။ ᥐᥩᥙ ᥘᥢᥴ ᥛᥨᥝᥴ ᥑᥦᥐᥴ ᥛᥨᥝᥴ ᥓᥥᥢ ᥘᥭᥳ ᥐᥩᥲ ᥘᥭᥲ ᥝᥣ ᥙᥥᥢ ᥙᥣᥭᥰ ᥛᥩᥢᥰ ᥙᥫᥒ ᥘᥫᥒ။
ᥛᥨᥝᥴ ᥐᥨᥝᥱ ᥔᥣᥒᥲ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]
ᥐᥨᥢᥰ ᥞᥝᥰ ᥘᥭᥳ ᥙᥧᥢ ᥖᥣᥱ ᥖᥥᥴ ᥓᥣᥒ ᥞᥥᥳ ᥘᥭᥲ ᥖᥣᥛᥱ ᥐᥖᥴ ᥖᥣᥛᥱ ᥛᥭᥲ ᥘᥢᥳ ᥓᥒᥱ ᥖᥤᥴ ᥞᥥᥖᥱ ᥟᥢ ᥐᥒᥲ ᥟᥢ ᥛᥧᥒᥰ ᥔᥥᥴ ᥕᥧᥱ ᥔᥝᥰ ᥘᥬᥰ ᥛᥢᥰ။ ᥛᥫ ᥞᥥᥖᥱ ᥖᥤ ᥕᥧᥱ ᥖᥢᥰ ᥔᥝᥰ ᥘᥢᥳ ᥐᥩᥲ ᥘᥒᥱ ᥞᥪᥴ ᥘᥛᥳ ᥚᥨᥢᥴ ᥖᥤᥴ ᥟᥛᥱ ᥞᥒᥰ ᥘᥢᥳ ᥓᥒᥱ ᥞᥥᥖᥱ ᥛᥧᥒᥰ ᥛᥢᥰ ᥓᥫᥢᥰ ᥓᥫᥢᥰ၊ ᥘᥒᥱ ᥞᥪᥴ ᥖᥥᥴ ᥘᥭᥲ ᥘᥨᥛᥰ ᥘᥢᥳ ᥓᥒᥱ ᥞᥥᥖᥱ ᥙᥣᥰ ᥞᥧᥰ ᥑᥝᥲ ᥞᥧᥰ ᥟᥩᥐᥱ ᥔᥥᥴ ᥐᥛᥰ ᥘᥪᥢᥰ ᥙᥥᥢ ᥛᥣᥰ ᥞᥣᥒ ᥚᥣᥒᥴ ᥞᥫᥢᥰ ᥐᥧ ᥙᥫᥒ ᥙᥫᥒ။ ᥘᥧᥐ ᥖᥤ ᥘᥩᥒ ᥑᥨᥒ ᥔᥣᥒᥲ ᥚᥣᥒᥴ ᥞᥣᥒ ᥞᥬᥲ ᥙᥨᥝᥰ ᥞᥣᥒ ᥘᥤ ᥐᥧ ᥙᥫᥒ ᥙᥫᥒ ᥘᥦᥲ ᥐᥣᥢ ᥛᥨᥝᥴ ᥐᥨᥝᥱ ᥔᥣᥒᥲ ᥘᥢᥳ ᥐᥩᥲ ᥑᥝᥲ ᥙᥥᥢ ᥙᥣᥰ ᥐᥣᥢ ᥙᥣᥭᥰ ᥛᥩᥢᥰ ᥙᥫᥒ ᥘᥫᥒ ᥕᥝᥳ။
ᥛᥨᥝᥴ ᥑᥣᥛᥰ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥐᥨᥢᥰ ᥞᥝᥰ ᥘᥭᥳ ᥙᥨᥝᥰ ᥛᥤᥰ ᥘᥩᥒ ᥖᥧᥛᥳ ᥖᥫᥳ ᥓᥬ ᥛᥣᥰ ᥘᥭᥴ ᥛᥢᥰ ᥛᥨᥝᥴ ᥟᥩᥐᥱ ᥔᥥᥒᥴ ᥛᥣᥰ ᥔᥥᥴ ᥔᥥᥒᥴ ᥘᥢᥳ ᥘᥥᥴ ᥙᥢ ᥘᥩᥒ ᥓᥬ ᥑᥝᥴ ᥙᥥᥢ ᥞᥪᥴ ᥝᥭᥳ ᥘᥭᥴ ᥕᥧᥱ။ ᥘᥩᥒ ᥞᥭᥲ ᥘᥩᥒ ᥑᥨᥝᥴ ᥘᥩᥒ ᥖᥨᥐᥱ ᥓᥬ ᥓᥫᥰ ᥘᥢᥳ ᥙᥥᥢ ᥔᥣ ᥚᥨᥝᥰ ᥚᥣᥒᥴ ᥞᥣᥒ ᥖᥤ ᥓᥬ ᥕᥝᥳ။ ᥘᥧᥐ ᥖᥤ ᥘᥢᥳ ᥔᥥᥴ ᥓᥒᥱ ᥙᥥᥢ ᥛᥣᥰ ᥔᥥᥒᥴ ᥑᥣᥛᥰ ᥛᥨᥢ ᥔᥫᥰ ᥔᥥᥒᥴ ᥑᥣᥛᥰ ᥛᥩᥒᥴ ᥓᥬ ᥔᥥᥒᥴ ᥑᥣᥛᥰ ᥛᥤᥰ ᥞᥦᥒᥰ ᥓᥬ ᥓᥫᥰ ᥘᥢᥳ ᥘᥦᥲ ᥘᥩᥒ ᥑᥨᥒ ᥞᥥᥖᥱ ᥟᥩᥐᥱ ᥚᥥᥒᥰ ᥑᥣᥛᥰ ᥛᥣᥰ ᥘᥢᥳ ᥐᥩᥲ ᥑᥝᥲ ᥙᥥᥢ ᥙᥣᥭᥰ ᥛᥩᥢᥰ ᥕᥝᥳ ။
ᥛᥨᥝᥴ ᥐᥣᥲ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]
ᥘᥫᥴ ᥔᥥᥴ ᥘᥢᥳ ᥟᥝ ᥖᥤᥢ ᥟᥝ ᥛᥪᥰ ᥟᥦᥒᥲ ᥟᥦᥝᥴ ᥐᥧᥛᥱ ᥑᥣᥴ ᥟᥝ ᥖᥨᥝ ᥖᥨᥒᥳ ᥘᥪᥒᥴ ᥘᥥᥴ ᥙᥢ ᥘᥩᥒ ᥘᥬᥰ ᥓᥬ ᥙᥥᥢ ᥞᥪᥴ ᥛᥤᥰ ᥞᥪᥴ ᥔᥥᥴ ᥙᥥᥢ ᥛᥣᥰ ᥙᥣᥭᥰ ᥛᥩᥢᥰ ᥘᥩᥒ ᥖᥣᥒᥰ ᥐᥣᥲ ᥖᥣᥒᥰ ᥛᥦᥙ ᥕᥧᥱ။ ᥝᥣᥭᥰ ᥛᥢᥰ ᥛᥣᥰ ᥕᥩᥢᥳ ᥙᥫ ᥘᥩᥒ ᥕᥥᥢᥱ ᥒᥥ ᥘᥩᥒ ᥕᥧᥱ ᥔᥝᥰ ᥑᥪᥢᥲ ᥕᥬᥱ ᥛᥬᥱ ᥔᥧᥒᥴ ᥛᥣᥰ ᥘᥦᥲ ᥘᥩᥒ ᥖᥦᥛᥲ ᥘᥤᥐ ᥐᥩᥲ ᥛᥤᥰ ᥛᥣᥰ။ ᥘᥧᥐ ᥖᥤ ᥘᥤᥐ ᥘᥢᥳ ᥔᥥᥴ ᥖᥦᥛᥲ ᥟᥩᥐᥱ ᥘᥥᥴ ᥛᥣᥰ ᥘᥩᥒ ᥘᥬᥰ ᥓᥬ ᥙᥥᥢ ᥞᥪᥴ ᥛᥤᥰ ᥘᥒᥱ ᥞᥪᥴ။