ᥙᥣᥭᥰ ᥙᥣᥳ ᥗᥣᥳ ᥝᥤᥱ
ᥙᥣᥭᥰ ᥘᥦᥒ ᥛᥫᥒᥰ (ᥑᥣᥛᥰ ᥛᥣᥢ ᥝᥣ : ပထဝီဝင်, ᥙᥖ ᥗᥣᥳ ᥝᥤᥱ ᥝᥤᥢ) ᥟᥢ ᥝᥣ ᥘᥭᥳ ᥙᥥᥢ ᥘᥩᥒ ᥘᥒᥴ ᥘᥤᥢ ᥛᥫᥒᥰ ᥘᥦᥲ ᥓᥫᥰ ᥟᥢ ᥐᥩᥒᥳ ᥐᥣᥭᥱ ᥐᥥᥝᥱ ᥐᥙᥴ ᥖᥒᥰ ᥘᥤᥢ ᥛᥫᥒᥰ ᥖᥒᥰ ᥔᥥᥒᥲ ᥕᥝᥳ။ ᥛᥫᥢᥴ ᥘᥒᥱ - ᥘᥤᥢ၊ ᥘᥛᥳ၊ ᥘᥨᥛᥰ၊ ᥗᥫᥢᥱ၊ ᥘᥩᥭ၊ ᥐᥨᥢᥰ ᥖᥨᥝ ᥔᥖᥴ ᥖᥒᥰ ᥔᥥᥒᥲ ᥟᥢ ᥓᥫᥰ ᥙᥥᥢ ᥝᥭᥳ ᥛᥧᥱ ᥚᥬᥴ ᥓᥧᥛᥰ ᥛᥢᥰ ᥔᥥᥴ ᥕᥝᥳ ᥐᥩᥲ ᥛᥤᥰ ᥝᥭᥳ ᥖᥣᥒᥰ ᥐᥩᥒᥳ ᥐᥣᥭᥱ ᥟᥢ ᥟᥛᥱ ᥚᥣᥖᥱ ᥕᥣᥢᥴ ᥐᥢ ᥘᥭᥲ ᥘᥒᥱ ᥘᥣᥭᥴ ᥓᥧᥛᥰ ᥘᥣᥭᥴ ᥓᥫᥰ ᥟᥢ ᥕᥧᥱ ᥖᥤ ᥞᥫᥢᥰ ᥘᥥᥝ ᥛᥫᥒᥰ ᥘᥥᥝ ᥐᥢ ᥘᥢᥳ ᥝᥭᥳ ᥙᥥᥢ ᥓᥧᥛᥰ ᥔᥫᥒᥰ ᥘᥥᥝ ᥐᥢ ᥝᥭᥳ ᥘᥦᥲ ᥓᥒᥱ ᥘᥭᥲ ᥞᥩᥒᥳ ᥝᥣ ᥙᥥᥢ ᥘᥦᥒ ᥛᥫᥒᥰ ᥘᥭᥴ ᥕᥝᥳ။ ᥐᥨᥢᥰ ᥞᥝᥰ ᥘᥭᥳ ᥟᥩᥢ ᥐᥢ ᥕᥧᥱ ᥝᥭᥳ ᥘᥫᥴ ᥘᥒᥴ ᥘᥤᥢ ᥛᥫᥒᥰ ᥕᥧᥱ ᥘᥦᥲ ᥘᥩᥒ ᥘᥥᥙ ᥞᥥᥢᥰ ᥘᥫᥭᥳ ᥘᥦᥒ ᥛᥫᥒᥴ ᥘᥭᥳ ᥖᥥᥴ ᥟᥛᥱ ᥙᥥᥢ ᥖᥣᥒᥰ ᥘᥣᥐᥱ ᥘᥣᥭᥰ ᥔᥒᥴ။
ᥙᥣᥭᥰ ᥘᥦᥒ ᥛᥫᥒᥰ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥘᥬᥰ ᥘᥧᥛᥲ ᥜᥣᥳ ᥘᥨᥒᥴ ᥘᥭᥳ ᥛᥤᥰ ᥔᥒᥴ ᥔᥥᥴ ᥙᥥᥢ ᥔᥒᥴ ᥝᥭᥳ ᥕᥧᥱ။ ᥛᥫᥒᥰ ᥗᥬᥴ ᥛᥤᥰ ᥖᥤ ᥘᥬ ᥘᥭᥴ ᥘᥢᥳ ᥙᥩᥰ ᥘᥥᥙ ᥞᥥᥢᥰ ᥙᥣᥭᥰ ᥘᥦᥒ ᥛᥫᥒᥰ ᥛᥣᥰ ᥘᥭᥳ ᥓᥒᥱ ᥖᥥᥴ ᥞᥧᥳ ᥘᥭᥲ ᥘᥤ ᥘᥤ ᥕᥝᥳ။ ᥘᥩᥒ ᥘᥛᥳ ᥘᥤᥢ ᥞᥤᥢᥴ ᥘᥨᥛᥰ ᥑᥝᥴ ᥘᥭᥴ ᥐᥩᥲ ᥓᥒᥱ ᥖᥥᥴ ᥓᥣᥒ ᥓᥦᥐᥱ ᥞᥧᥳ ᥘᥭᥲ ᥛᥥᥝᥰ ᥘᥬ ᥛᥥᥝᥰ ᥘᥢᥳ ᥐᥣᥱ ᥗᥦᥢᥲ။ ᥙᥩᥰ ᥘᥥᥙ ᥞᥥᥢᥰ ᥙᥣᥭᥰ ᥘᥦᥒ ᥛᥫᥒᥰ ᥓᥪᥒ ᥞᥝᥰ ᥖᥥᥴ ᥘᥭᥲ ᥞᥧᥳ ᥘᥩᥒ ᥘᥣᥲ ᥛᥫᥒᥰ၊ ᥞᥧᥳ ᥘᥣᥭᥰ ᥖᥨᥭᥰ ᥚᥦᥢᥱ ᥖᥤ ᥘᥤᥢ ᥛᥫᥒᥰ၊ ᥞᥧᥳ ᥝᥣ ᥛᥫᥒᥰ ᥘᥬ ᥛᥤᥰ ᥖᥤ ᥘᥬ။ ᥙᥣᥭᥰ ᥘᥦᥒ ᥛᥫᥒᥰ ᥘᥭᥳ ᥙᥥᥢ ᥐᥣᥢ ᥟᥢ ᥖᥦᥖ ᥘᥦᥖ ᥖᥣᥭ ᥖᥨᥝ။ ᥟᥢ ᥖᥪᥢᥰ ᥛᥤᥰ ᥝᥭᥳ ᥕᥝᥳ ᥘᥢᥳ ᥘᥦᥲ ᥘᥣᥛᥰ ᥘᥤᥛᥰ ᥔᥩᥢᥴ ᥐᥢ ᥟᥛᥱ ᥘᥭᥲ။
ᥘᥦᥒ ᥛᥫᥒᥰ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥘᥦᥒ ᥛᥫᥒᥰᥟᥢ ᥝᥣ ᥘᥭᥳ ᥙᥥᥢ ᥑᥣᥛᥰ ᥖᥭᥰ ᥞᥝᥰ ᥟᥢ ᥛᥤᥰ ᥖᥤ ᥙᥩᥒᥱ ᥝᥣ ᥘᥒᥱ ᥐᥣ ᥓᥧᥛᥰ ᥓᥫᥰ ᥟᥢ ᥐᥥᥝᥱ ᥐᥙᥴ ᥙᥣᥰ ᥘᥨᥭᥲ ᥖᥒᥰ ᥛᥫᥒᥰ ᥘᥤᥢ ᥖᥤ ᥕᥧᥱ။ ᥛᥫᥢᥴ ᥘᥒᥱ ᥘᥤᥢ၊ ᥘᥛᥳ၊ ᥘᥩᥭ၊ ᥗᥫᥢᥱ၊ ᥘᥨᥛᥰ၊ ᥜᥤᥒᥲ ᥜᥣᥳ၊ ᥐᥣᥒ ᥞᥣᥝᥴ၊ ᥖᥨᥝ ᥛᥤᥰ ᥓᥬ ᥟᥢ ᥟᥛᥱ ᥛᥤᥰ ᥓᥬ ᥖᥒᥰ ᥘᥨᥒᥴ ᥟᥢ ᥐᥩᥒᥳ ᥐᥣᥭᥱ ᥝᥭᥳ ᥖᥒᥰ ᥛᥫᥒᥰ ᥐᥨᥢᥰ ᥞᥝᥰ ᥖᥒᥰ ᥔᥥᥒᥲ ᥘᥭᥳ ᥙᥣᥰ ᥝᥭᥳ ᥘᥬᥰ ᥓᥧᥛᥰ ᥔᥫᥒᥰᥘᥦᥒ ᥛᥫᥒᥰᥕᥝᥳ။ᥙᥣᥭᥰ ᥘᥦᥒ ᥛᥫᥒᥰ ᥟᥢ ᥝᥣ ᥘᥢᥳ ᥔᥛᥳ ᥙᥥᥢ ᥐᥣᥢ ᥟᥢ ᥘᥥᥙ ᥞᥥᥢᥰ ᥞᥬᥲ ᥞᥧᥳ ᥘᥩᥒ ᥘᥦᥒ ᥛᥫᥒᥰ ᥘᥦᥲ ᥟᥢ ᥐᥙᥴ ᥐᥣᥭᥱ ᥘᥨᥭᥲ ᥘᥦᥒ ᥛᥫᥒᥰ ᥖᥒᥰ ᥔᥥᥒᥲ ᥘᥭᥳ ᥘᥭᥲ ᥞᥩᥒᥳ ᥝᥣ"ᥙᥣᥭᥰ ᥘᥦᥒ ᥛᥫᥒᥰ" ᥕᥝᥳ။
ᥘᥤᥢ၊ ᥘᥒᥴ ᥘᥤᥢ၊ ᥘᥤᥢ ᥛᥫᥒᥰ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥖᥤ ᥟᥢ ᥐᥨᥢᥰ၊ ᥔᥖᥴ၊ ᥖᥨᥢᥲ၊ ᥖᥨᥝ ᥛᥤᥰ ᥓᥬ ᥑᥝᥴ ᥘᥭᥲ ᥙᥪᥒ ᥟᥤᥒ ᥕᥧᥱ ᥔᥝᥰ ᥙᥥᥢ ᥓᥬ ᥝᥭᥳ ᥕᥧᥱ ᥘᥫᥴ ᥛᥢᥰ ᥘᥭᥳ ᥞᥩᥒᥳ ᥝᥣ"ᥘᥤᥢ" ᥟᥛᥱ ᥘᥢᥴ"ᥘᥒᥴ ᥘᥤᥢ" ᥘᥭᥴ ᥕᥝᥳ။ ᥘᥫᥴ ᥘᥒᥴ ᥘᥤᥢ ᥘᥭᥳ ᥘᥛᥳ၊ ᥘᥤᥢ၊ ᥘᥨᥛᥰ၊ ᥞᥤᥢᥴ ᥚᥣᥴ ᥑᥝᥴ ᥓᥫᥰ ᥘᥭᥳ ᥐᥩᥲ ᥞᥨᥛ ᥛᥤᥰ ᥝᥭᥳ ᥙᥣᥰ ᥗᥦᥢᥲ ᥕᥧᥱ။ ᥖᥣᥒᥰ ᥟᥢ ᥙᥥᥢ ᥖᥤ ᥕᥧᥱ ᥖᥣᥱ ᥖᥨᥝ ᥛᥤᥰ ᥓᥬ ᥛᥨᥝᥴ ᥞᥧᥳ ᥟᥢ ᥟᥛᥱ ᥛᥨᥝᥴ ᥞᥧᥳ ᥑᥝᥴ ᥔᥥᥒᥲ ᥔᥥᥒᥲ ᥕᥧᥱ ᥔᥝᥰ ᥓᥩᥛᥰ ᥐᥢ ᥝᥭᥳ ᥘᥭᥳ ᥘᥭᥲ ᥞᥩᥒᥳ ᥝᥣ"ᥘᥤᥢ ᥛᥫᥒᥰ" ᥘᥭᥴ ᥕᥝᥳ။
ᥘᥧᥛᥲ ᥜᥣᥳ၊ ᥐᥛᥱ ᥜᥣᥱ၊ ᥘᥨᥐ ᥑᥨᥒᥰ (ᥘᥨᥐ)
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥘᥦᥒ ᥘᥤᥢ ᥛᥫᥒᥰ ᥟᥢ ᥞᥝᥰ ᥕᥧᥱ ᥝᥭᥳ ᥕᥧᥱ ᥘᥭᥳ ᥛᥢᥰ ᥐᥣᥒᥲ ᥖᥥᥳ ᥖᥥᥳ။ ᥛᥤᥰ ᥘᥒ ᥘᥤᥢ ᥐᥩᥭᥰ ᥟᥛᥱ ᥐᥣᥰ ᥛᥤᥰ ᥙᥣᥰ ᥘᥛᥳ ᥟᥢ ᥐᥣᥒᥲ ᥘᥪᥐᥳ ᥝᥭᥳ ᥘᥢᥳ ᥗᥦᥢᥲ။ ᥘᥒᥴ ᥘᥤᥢ ᥛᥫᥒᥰ ᥐᥣᥒᥲ ᥘᥨᥒᥴ ᥟᥢ ᥙᥥᥢ"ᥘᥪᥛ ᥘᥤᥢ"(ᥐᥧᥢ ᥕᥬᥱ ᥘᥨᥒᥴ) ᥓᥥᥖᥱ ᥐᥧᥢᥱ ᥘᥦᥲ ᥘᥛᥳ ᥐᥣᥒᥲ ᥘᥪᥐᥳ ᥘᥨᥒᥴ ᥘᥣᥒᥴ ᥟᥢ ᥞᥩᥒᥳ ᥝᥣ"ᥘᥛᥳ ᥔᥛᥱ ᥛᥧᥐᥳ" ᥞᥣᥲ ᥛᥥ ᥑᥝᥲ ᥞᥨᥛ ᥞᥩᥛᥰ ᥐᥢ ᥔᥥᥴ ᥙᥥᥢ ᥝᥭᥳ ᥞᥬᥲ ᥐᥨᥢᥰ၊ ᥔᥖᥴ၊ ᥖᥨᥢᥲ ᥛᥭᥳ ᥑᥝᥴ ᥖᥒᥰ ᥘᥨᥒᥴ ᥕᥧᥱ ᥔᥝᥰ ᥘᥭᥲ ᥐᥣᥱ ᥛᥣᥰ ᥞᥣᥴ ᥐᥤᥢ ᥘᥭᥲ ᥘᥢᥳ ᥔᥛᥳ ᥞᥩᥒᥳ ᥝᥣ"ᥘᥧᥛᥲ ᥜᥣᥳ" ᥟᥛᥱ ᥘᥢᥴ"ᥐᥛᥱ ᥜᥣᥱ" ᥟᥛᥱ ᥘᥢᥴ"ᥘᥨᥐ" (ᥘᥨᥐ ᥑᥨᥒᥰ - ᥘᥨᥝᥰ ᥐᥣᥳ) ᥘᥭᥴ ᥕᥝᥳ။ ᥘᥫᥴ ᥘᥪᥛ ᥘᥤᥢ ᥘᥨᥒᥴ ᥘᥢᥳ ᥛᥤᥰ ᥘᥤᥢ ᥙᥥᥒᥰ၊ ᥙᥣᥱ ᥕᥫᥲ၊ ᥘᥩᥭ၊ ᥗᥫᥢᥱ၊ ᥞᥣᥖᥱ ᥔᥣᥭᥰ၊ ᥛᥥ ᥘᥛᥳ၊ ᥘᥩᥒᥴ ᥘᥛᥳ ᥓᥫᥰ ᥘᥭᥳ ᥘᥬ ᥗᥦᥢᥲ ᥐᥩᥢᥱ ᥕᥝᥳ။
ᥘᥩᥭ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥘᥤᥢ ᥔᥧᥒᥴ ᥟᥢ ᥚᥧᥖᥴ ᥙᥦᥢ ᥝᥭᥳ ᥘᥫᥴ ᥔᥥᥴ ᥞᥤᥛᥰ ᥞᥩᥛᥰ ᥓᥦᥒ ᥓᥦᥒ ᥘᥦᥒᥰ ᥘᥦᥒᥰ ᥖᥒᥰ ᥖᥒᥲ ᥐᥨᥐᥱ ᥕᥨᥐᥱ ᥘᥢᥳ ᥘᥭᥲ ᥞᥩᥒᥳ ᥝᥣ"ᥘᥩᥭ" ᥘᥭᥴ ᥕᥝᥳ။ ᥘᥣᥲ ᥘᥤᥢ ᥟᥢ ᥔᥧᥒᥴ ᥘᥫᥴ ᥔᥥᥴ ᥘᥛᥳ ᥙᥣᥒᥱ ᥘᥣᥭᥱ 600 ᥛᥤᥰ ᥖᥬᥰ ᥐᥣᥱ ᥘᥢᥳ ᥘᥭᥲ ᥞᥩᥒᥳ ᥝᥣ"ᥘᥩᥭ" ᥘᥭᥴ ᥕᥝᥳ။
ᥗᥫᥢᥱ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥖᥤ ᥟᥢ ᥙᥣᥱ ᥛᥭᥳ ᥑᥫᥰ ᥕᥧᥛᥰ ᥖᥨᥢᥲ ᥖᥒᥰ ᥘᥛᥴ ᥘᥣᥭᥴ ᥑᥝᥴ ᥟᥩᥐᥱ ᥑᥥᥳ ᥐᥢ ᥞᥤᥛᥴ ᥐᥢ ᥟᥩᥐᥱ ᥑᥨᥢᥰ ᥑᥝᥰ ᥐᥢ ᥝᥭᥳ ᥟᥛᥱ ᥛᥤᥰ ᥙᥐᥴ ᥙᥫᥒ ᥔᥒᥴ ᥖᥒᥰ ᥘᥛᥴ ᥖᥒᥰ ᥘᥣᥭᥴ ᥘᥢᥳ ᥘᥭᥲ ᥞᥩᥒᥳ ᥝᥣ ᥙᥥᥢ"ᥗᥫᥢᥱ" ᥕᥝᥳ။ ᥙᥣᥱ ᥛᥭᥳ ᥘᥨᥒ ᥖᥒᥰ ᥘᥛᥴ ᥞᥨᥛ ᥐᥢ ᥘᥢᥳ ᥐᥩᥲ ᥞᥩᥒᥳ ᥝᥣ"ᥗᥫᥢᥱ" ᥘᥒᥱ ᥐᥝᥱ ᥕᥝᥳ။ ᥘᥫᥴ ᥘᥒᥴ ᥘᥤᥢ ᥛᥫᥒᥰ ᥘᥬᥰ ᥘᥧᥛ ᥜᥣᥳ ᥘᥭᥳ"ᥗᥫᥢᥱ" ᥟᥝ ᥖᥤ ᥝᥭᥳ ᥖᥣᥱ ᥔᥤᥙᥴ ᥙᥧᥢ ᥘᥫᥒ ᥙᥧᥢ ᥘᥭᥴ ᥕᥝᥳ။
ᥙᥣᥱ ᥞᥣᥖᥱ ᥔᥣᥭᥰ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥘᥒᥴ ᥘᥤᥢ ᥖᥤ ᥟᥢ ᥙᥥᥢ ᥞᥤᥢᥴ ᥙᥥᥢ ᥔᥣᥭᥰ ᥘᥣᥭᥴ ᥘᥣᥭᥴ ᥔᥥᥴ ᥟᥛᥱ ᥛᥤᥰ ᥕᥫᥲ ᥕᥣᥲ ᥟᥛᥱ ᥛᥤᥰ ᥖᥨᥢᥲ ᥛᥭᥳ ᥔᥒᥴ ᥔᥥᥴ ᥓᥫᥳ ᥔᥥᥴ ᥙᥫᥒ ᥘᥢᥳ ᥞᥩᥒᥳ ᥝᥣ"ᥙᥣᥱ ᥞᥣᥖᥱ ᥔᥣᥭᥰ" ᥘᥭᥴ ᥕᥝᥳ။ ᥘᥫᥴ ᥘᥒᥴ ᥘᥤᥢ ᥘᥧᥛᥲ ᥜᥣᥳ ᥘᥭᥳ ᥙᥣᥱ ᥞᥣᥖᥱ ᥔᥣᥭᥰ ᥟᥝ ᥖᥤ ᥛᥢᥰ ᥝᥭᥳ ᥔᥣᥛᥴ ᥙᥧᥢ ᥘᥫᥒ ᥙᥧᥢᥲ။ ᥙᥣᥱ ᥞᥣᥖᥱ ᥔᥣᥭᥰ ᥘᥭᥳ ᥞᥣᥛᥳ ᥘᥛᥴ ᥛᥤᥰ ᥖᥤ ᥛᥫᥒᥰ ᥛᥭᥲ ᥜᥣᥳ ᥘᥦᥒᥳ ᥘᥦᥲ ᥞᥤᥛᥰ ᥜᥣᥒᥱ ᥙᥣᥒᥱ ᥘᥣᥭᥱ။ ᥛᥫᥒᥰ ᥖᥭᥰ ᥙᥥᥢ ᥛᥫᥒᥰ ᥜᥣᥳ ᥜᥨᥢᥴ ᥘᥤ ᥘᥦᥲ ᥙᥣᥱ ᥞᥣᥖᥱ ᥔᥣᥭᥰ ᥘᥨᥒᥰ ᥘᥢᥳ ᥟᥛᥱ ᥛᥤᥰ။ ᥞᥤᥛᥰ ᥜᥣᥒᥱ ᥘᥛᥳ ᥖᥥᥳ ᥖᥨᥝᥳ ᥖᥥᥳ ᥛᥤᥰ ᥞᥣᥖᥱ ᥔᥣᥭᥰ ᥕᥧᥱ ᥟᥤᥖᥴ ᥟᥩᥖᥴ။
ᥛᥥ ᥘᥛᥳ (ᥑᥥᥰ ᥘᥛᥳ)
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥑᥥᥰ ᥘᥛᥳ ᥙᥥᥢ ᥞᥩᥒ ᥟᥢ ᥛᥤᥰ ᥘᥛᥳ ᥘᥭᥴ ᥘᥣᥭᥱ ᥕᥧᥱ ᥖᥣᥱ ᥔᥥᥱ ᥘᥢᥳ ᥕᥝᥳ။ ᥘᥛᥳ ᥜᥨᥢᥴ ᥖᥨᥐᥱ ᥘᥨᥒᥰ ᥛᥣᥰ ᥘᥦᥲ ᥔᥒᥴ၊ ᥘᥛᥳ ᥛᥩᥖᥴ၊ ᥘᥛᥳ ᥞᥧᥰ ᥟᥢ ᥟᥩᥐᥱ ᥛᥣᥰ ᥘᥦᥲ ᥔᥒᥴ ᥞᥨᥛ ᥐᥢ ᥘᥭᥴ ᥘᥨᥒᥰ ᥙᥥᥢ ᥞᥩᥒ ᥟᥩᥢᥱ။ ᥞᥩᥒ ᥟᥩᥢᥱ ᥖᥒᥰ ᥘᥛᥴ ᥘᥭᥴ ᥞᥨᥛ ᥐᥢ ᥙᥥᥢ ᥛᥣᥰ ᥛᥥ ᥘᥛᥳ။ ᥛᥥ ᥘᥛᥳ ᥟᥩᥢᥱ ᥖᥒᥰ ᥘᥛᥴ ᥞᥨᥛ ᥐᥢ ᥔᥥᥴ ᥙᥥᥢ ᥛᥣᥰ ᥛᥥ ᥘᥛᥳ ᥘᥨᥒᥴ ᥕᥧᥱ ᥕᥝᥳ။ ᥘᥛᥳ ᥘᥭᥴ ᥖᥒᥰ ᥘᥨᥒᥴ ᥘᥭᥳ ᥞᥩᥒᥳ ᥝᥣ"ᥘᥛᥳ ᥑᥥᥰ"။ ᥛᥫᥢᥴ ᥘᥒᥱ ᥘᥬᥰ ᥛᥫᥒᥰ ᥖᥭᥰ ᥔᥦᥢᥰ ᥘᥭᥳ ᥘᥛᥳ ᥖᥧᥲ၊ ᥘᥛᥳ ᥙᥣᥒ၊ ᥘᥛᥳ ᥖᥥᥒᥰ၊ ᥘᥛᥳ ᥘᥨᥭᥴ၊ ᥘᥛᥳ ᥘᥥᥢᥰ ᥓᥫᥰ ᥘᥢᥳ ᥙᥥᥢ ᥛᥥ ᥘᥛᥳ (ᥑᥥᥰ ᥘᥛᥳ)ᥟᥩᥢᥱ ᥔᥥᥴ ᥘᥛᥳ ᥑᥨᥒᥰ၊ ᥘᥛᥳ ᥑᥩᥒᥴ ᥔᥛᥳ ᥙᥥᥢ ᥛᥥ ᥘᥛᥳ ᥘᥨᥒᥴ ᥘᥢᥳ ᥕᥝᥳ။
ᥙᥣᥒᥱ ᥘᥣᥭᥱ ᥘᥦᥲ ᥔᥛᥱ ᥛᥧᥐ ᥖᥣᥱ
[ᥛᥨᥢᥳ ᥛᥥᥰ | ᥛᥥᥰ ᥗᥖᥴ ᥒᥝᥲ ᥒᥣᥱ]ᥙᥣᥒᥱ ᥘᥛᥳ ᥐᥣᥒᥲ ᥘᥨᥒᥴ ᥖᥤ ᥟᥢ ᥘᥛᥳ ᥞᥩᥒ၊ ᥘᥛᥳ ᥑᥥᥰ၊ ᥘᥛᥳ ᥛᥥ ᥕᥬᥱ ᥟᥩᥢᥱ ᥖᥒᥰ ᥘᥣᥭᥴ ᥑᥝᥴ ᥘᥭᥴ ᥑᥝᥲ ᥐᥣᥱ ᥞᥩᥛᥰ ᥘᥛᥳ ᥑᥝᥲ ᥓᥧᥰ ᥐᥢ ᥘᥢᥳ ᥞᥩᥒᥳ ᥝᥣ"ᥙᥣᥒᥱ ᥘᥣᥭᥱ" ᥘᥭᥴ ᥕᥝᥳ။ ᥘᥛᥳ ᥞᥨᥭᥲ၊ ᥘᥛᥳ ᥘᥩᥭ၊ ᥘᥛᥳ ᥞᥩᥒ၊ ᥘᥛᥳ ᥑᥥᥰ၊ ᥛᥥ ᥘᥛᥳ ᥟᥩᥢᥱ ᥑᥝᥴ ᥘᥭᥲ ᥞᥩᥛᥰ ᥙᥥᥢ ᥛᥥ ᥘᥛᥳ ᥘᥨᥒᥴ။ ᥐᥧ ᥛᥥ ᥘᥛᥳ ᥔᥛᥳ ᥘᥭᥴ ᥘᥨᥒᥰ ᥐᥣᥱ ᥑᥩᥢᥲ ᥑᥝᥲ ᥐᥢ ᥖᥤ ᥙᥣᥒᥱ ᥙᥥᥒᥰ ᥘᥨᥒᥴ ᥟᥢ ᥞᥩᥒᥳ ᥝᥣ ᥙᥣᥒᥱ ᥘᥣᥭᥱ ᥘᥢᥳ ᥕᥝᥳ။ ᥘᥣᥭᥱ ᥛᥥ ᥘᥛᥳ ᥖᥒᥰ ᥘᥣᥭᥴ ᥐᥣᥱ ᥑᥩᥖᥱ ᥕᥩᥖ ᥑᥩᥢᥲ ᥞᥨᥛ ᥐᥢ ᥖᥤ"ᥙᥣᥒᥱ" ᥘᥛᥳ ᥐᥣᥒᥲ ᥘᥨᥒᥴ ᥘᥦᥲ ᥓᥒᥱ ᥘᥭᥲ ᥞᥩᥒᥳ ᥝᥣ"ᥙᥣᥒᥱ ᥘᥣᥭᥱ" ᥘᥭᥴ ᥕᥝᥳ။ ᥘᥛᥳ ᥙᥣᥒᥱ ᥘᥣᥭᥱ ᥘᥣᥭᥴ ᥛᥥ ᥛᥣᥰ ᥞᥨᥛ ᥐᥢ ᥘᥢᥴ ᥔᥛᥳ ᥞᥩᥒᥳ ᥝᥣ"ᥘᥛᥳ ᥔᥛᥱ ᥛᥧᥐᥳ" (ᥙᥣᥒᥱ ᥘᥣᥭᥱ ᥘᥨᥒᥴ -ᥔᥣ ᥛᥧᥐᥳ ᥖᥣᥱ) ᥘᥭᥴ ᥕᥝᥳ။