ᥘᥨᥐ ᥐᥨᥝ ᥞᥧᥰ

ᥘᥭᥲ ᥒᥤᥢᥰ ᥐᥨᥢᥰ ᥗᥝᥲ ᥝᥣ ᥘᥨᥐ ᥐᥨᥝ ᥞᥧᥰ ᥙᥥᥢ ᥐᥨᥢᥰ ᥖᥣᥭ ᥙᥥᥢ。ᥟᥣ ᥙᥧᥛᥱ ᥛᥢᥰ ᥘᥒᥱ ᥘᥭᥳ：

ᥛᥫ ᥓᥝᥳ ᥓᥝᥳ ᥘᥢᥳ，ᥛᥤᥰ ᥘᥧᥐ ᥟᥩᥢᥱ ᥐᥨᥝᥳ ᥘᥫᥒ，ᥐᥩᥙ ᥙᥫ ᥛᥥ ᥟᥩᥐᥱ ᥛᥢᥰ ᥖᥣᥭ ᥓᥝᥳ ᥚᥦᥝᥴ，ᥖᥥ ᥑᥝᥴ ᥓᥝᥱ ᥐᥣᥱ ᥑᥣᥴ ᥛᥥ ᥛᥣᥭᥲ ᥛᥣᥰ ᥔᥪᥙ ᥛᥥ ᥛᥢᥰ，ᥔᥛᥳ ᥟᥩᥢ ᥘᥭᥲ ᥘᥩᥒᥳ ᥓᥣᥭᥰ ᥛᥣᥰ ᥞᥬᥲᥛᥢᥰ ᥐᥨᥝᥳ ᥘᥫᥒ。ᥛᥢᥰ ᥐᥦᥢᥱ ᥞᥐ ᥘᥩᥒᥳ ᥓᥣᥭᥰ ᥛᥢᥰ ᥖᥥᥳ ᥖᥥᥳ。ᥐᥣᥱ ᥘᥥᥒᥳ ᥒᥨᥝᥰ ᥘᥥᥒᥳ ᥑᥣᥭᥰ ᥛᥢᥰ ᥟᥩᥢ ᥘᥩᥒᥳ ᥓᥣᥭᥰ ᥛᥢᥰ ᥞᥨᥛ ᥔᥤᥱ ᥘᥫᥴ ᥘᥒᥴ ᥒᥨᥝᥰ ᥑᥣᥭᥰ ᥞᥦᥴ ᥐᥣᥱ；ᥒᥨᥝᥰ ᥑᥣᥭᥰ ᥘᥤᥴ ᥐᥣᥱ ᥐᥤᥢ ᥐᥣᥱ ᥖᥣᥭᥰ ᥔᥨᥢᥴ ᥙᥫᥢ，ᥔᥩᥒᥴ ᥑᥣᥴ ᥟᥩᥢ ᥐᥢ ᥘᥦᥢ ᥐᥣᥱ ᥗᥦᥛᥴ ᥐᥢ ᥖᥩᥢᥰ ᥗᥦᥛᥴ ᥐᥢ ᥞᥨᥝᥲ；ᥑᥝᥲ ᥘᥛᥳ ᥑᥣᥴ ᥙᥧ ᥑᥣᥴ ᥙᥣ，ᥛᥢᥰ ᥐᥩᥲ ᥞᥩᥒᥳ ᥘᥩᥒᥳ ᥓᥣᥭᥰ ᥞᥨᥛ ᥙᥭ，ᥝᥤᥖ ᥘᥛᥳ ᥙᥣᥢᥲ ᥖᥦᥢ ᥔᥩᥒᥴ ᥑᥣᥴ ᥙᥢᥱ ᥐᥢ ᥙᥩᥒ，ᥗᥦᥛᥴ ᥐᥢ ᥞᥥᥖᥱ；ᥙᥩᥐ ᥑᥪᥢᥰ ᥞᥫᥒᥰ ᥛᥣᥰ，ᥔᥩᥒᥴ ᥑᥣᥴ ᥐᥤᥢ ᥞᥨᥛ ᥚᥫᥢᥴ ᥘᥩᥢᥰ ᥞᥨᥛ ᥐᥧᥱ。ᥐᥩᥭᥰ ᥝᥣ，ᥛᥥ ᥑᥝᥴ ᥐᥦᥢᥱ ᥓᥬ ᥞᥣᥭᥳ ᥓᥬ ᥑᥩᥖᥴ，ᥐᥩᥭᥰ ᥞᥐ ᥘᥧᥐ ᥓᥣᥭᥰ ᥟᥩᥐᥱ ᥛᥢᥰ，ᥑᥣᥢᥳ ᥞᥢᥴ ᥘᥧᥐ ᥓᥣᥭᥰ ᥐᥨᥝᥳ ᥛᥥ ᥟᥩᥢ ᥖᥣᥒᥰ。ᥛᥤᥰ ᥑᥝᥲ ᥛᥤᥰ ᥚᥐᥴ ᥝᥣᥢᥴ ᥛᥣᥰ，ᥐᥩᥭᥰ ᥐᥤᥙ ᥞᥬᥲ ᥐᥨᥝᥳ ᥘᥩᥒᥳ ᥐᥤᥢ，ᥚᥩᥒᥰ ᥝᥣ ᥐᥨᥝᥳ ᥛᥥ ᥓᥣᥭᥰ ᥑᥬᥲ ᥐᥤᥙ ᥘᥫᥳ ᥛᥣᥰ ᥐᥤᥢ，ᥛᥥ ᥑᥝᥴ ᥓᥝᥱ ᥞᥪᥖᥴ ᥘᥣᥱ ᥝᥣ：“ᥑᥩᥒᥴ ᥖᥦᥐᥱ ᥘᥭᥲ ᥘᥛᥴ ᥘᥨᥒᥴ ᥛᥬᥰ ᥞᥫᥭᥰ，ᥙᥩᥰ ᥐᥤᥢ ᥒᥖᥰ ᥝᥢᥰ ᥞᥝᥳ ᥕᥒᥰ ᥟᥛᥱ ᥙᥣ ᥔᥖ ᥟᥤᥛᥱ ᥔᥖ ᥖᥥᥛ ᥘᥭᥴ？”ᥖᥣᥒᥰ ᥖᥥᥳ ᥐᥨᥝᥳ ᥙᥤ ᥓᥣᥭᥰ ᥑᥝᥲ ᥓᥒᥱ ᥘᥭᥲ ᥖᥨᥐᥱ ᥖᥩᥒᥳ ᥝᥣᥢᥱ ᥘᥫᥒ。ᥛᥫ ᥑᥝᥲ ᥐᥣᥖᥱ ᥑᥝᥲ ᥔᥣᥰ ᥙᥣᥰ ᥘᥭᥲ ᥑᥩᥒᥴ ᥜᥣᥐᥱ ᥛᥣᥰ，ᥛᥥ ᥑᥝᥴ ᥔᥛᥳ ᥟᥝ ᥘᥐ ᥔᥪᥒᥱ ᥝᥭᥳ ᥞᥬᥲ ᥘᥧᥐ ᥟᥩᥐᥱ ᥛᥢᥰ ᥐᥤᥢ，ᥐᥨᥝᥳ ᥙᥤ ᥓᥣᥭᥰ ᥖᥒᥰ ᥞᥣᥒ ᥛᥢᥰ ᥐᥩᥲ ᥕᥒ ᥞᥩᥢᥱ ᥘᥭᥲ ᥞᥢᥴ ᥔᥤᥴ ᥙᥩᥐ ᥔᥤᥴ ᥙᥣᥢ。ᥛᥣᥒ ᥙᥩᥐ ᥛᥣᥒ ᥘᥬ ᥐᥨᥝᥳ ᥘᥩᥒᥳ ᥘᥐ ᥘᥩᥛᥴ ᥟᥝ ᥛᥣᥰ ᥛᥦᥒᥱ ᥞᥬᥲ ᥓᥣᥭᥰ ᥐᥤᥢ ᥘᥤ ᥟᥤᥖᥴ ᥘᥤ ᥟᥩᥖᥴ，ᥛᥥ ᥑᥝᥴ ᥕᥣᥰ ᥞᥢᥴ ᥞᥦᥴ ᥔᥛᥳ ᥓᥣᥳ ᥓᥣᥳ ᥘᥣᥱ ᥘᥣᥱ ᥐᥨᥝᥳ ᥙᥤ ᥓᥣᥭᥰ ᥟᥥᥐᥱ ᥔᥛᥳ ᥛᥒ ᥗᥦᥢᥲ。ᥘᥩᥒᥳ ᥓᥣᥭᥰ ᥘᥭᥲ ᥘᥧᥒ ᥔᥫᥲ ᥑᥨᥝᥰ ᥛᥬᥰ，ᥛᥢᥰ ᥓᥣᥭᥰ ᥐᥩᥭᥰ ᥛᥤᥰ ᥔᥫᥲ ᥕᥩᥐᥱ ᥐᥨᥢ ᥜᥧᥒᥴ ᥙᥨᥐ ᥖᥨᥝ ᥞᥨᥝᥱ ᥑᥤᥒᥰ ᥐᥧ ᥛᥫ。

ᥛᥤᥰ ᥝᥢᥰ ᥘᥫᥒ，ᥛᥥ ᥑᥝᥴ ᥓᥬᥲ ᥓᥬ，ᥔᥒᥴ ᥝᥣ ᥙᥭᥱ ᥛᥤᥰ ᥟᥥᥴ ᥓᥬ ᥒᥫᥲ ᥓᥬ ᥑᥣᥢ ᥘᥨᥒᥴ ᥐᥨᥝᥳ ᥘᥭᥳ，ᥑᥨᥝᥰ ᥞᥫᥢᥰ ᥑᥨᥝᥰ ᥕᥥᥰ ᥐᥝ ᥘᥛᥴ ᥑᥭᥳ ᥓᥝᥱ ᥙᥨᥒ ᥓᥬ ᥘᥧᥐ ᥓᥣᥭᥰ ᥟᥩᥐᥱ ᥐᥝ ᥖᥪᥰ ᥞᥝᥳ。ᥐᥛᥰ ᥘᥭᥳ，ᥛᥢᥰ ᥑᥬᥲ ᥓᥬ ᥟᥩᥐᥱ ᥓᥬ ᥖᥧᥲ ᥓᥬ ᥖᥩᥖᥱ ᥛᥣᥰ。ᥛᥢᥰ ᥖᥫᥳ ᥘᥧᥐ ᥓᥣᥭᥰ ᥛᥢᥰ ᥖᥒᥰ ᥔᥩᥒᥴ ᥐᥨᥝ ᥖᥣᥢᥲ ᥝᥣ，ᥛᥫ ᥚᥧᥐ ᥛᥣᥰ ᥔᥩᥒᥴ ᥑᥫᥴ ᥙᥤ ᥘᥩᥒᥳ ᥟᥝ ᥗᥨᥝᥱ ᥑᥨᥢᥴ ᥐᥣᥱ ᥖᥦᥢᥰ ᥘᥫᥴ ᥞᥭ ᥘᥩᥭ ᥘᥢᥳ。ᥘᥤ ᥐᥨᥝᥳ ᥖᥦᥢᥰ ᥘᥤ ᥖᥨᥒᥱ，ᥕᥒ ᥗᥦᥛᥴ ᥐᥢᥘᥭᥲ。ᥗᥫᥒᥴ ᥝᥣ ᥗᥨᥝᥱ ᥚᥬᥴ ᥓᥥᥝᥰ ᥟᥩᥐᥱ，ᥛᥢᥰᥓᥝᥱ ᥓᥥᥝᥰ ᥛᥣᥰ ᥞᥫᥢᥰ，ᥚᥩᥒᥰ ᥝᥣ ᥟᥝᥱ ᥙᥣ ᥟᥩᥐᥱ，ᥛᥢᥰ ᥘᥨᥝᥱ ᥙᥬᥳ ᥝᥭᥳ ᥐᥧ ᥝᥢᥰ，ᥗᥣᥲ ᥗᥪᥒᥴ ᥗᥨᥝᥱ ᥒᥩᥐ ᥟᥩᥐᥱ ᥛᥣᥰ ᥞᥦᥴ ᥓᥒᥱ ᥘᥭᥲ ᥛᥣᥰ ᥞᥫᥒᥰ。

ᥙᥩᥒᥱ ᥛᥫ ᥚᥧᥐ ᥛᥣᥰ，ᥛᥥ ᥑᥝᥴ ᥟᥝ ᥜᥢᥰ ᥗᥨᥝᥱ ᥛᥦᥒᥱ ᥚᥬᥲ ᥔᥩᥒᥴ ᥑᥣᥴ ᥙᥤ ᥘᥩᥒᥳᥘᥤ ᥐᥨᥝᥳ ᥘᥤ ᥞᥨᥝᥱ。ᥔᥩᥒᥴ ᥑᥣᥴ ᥙᥤ ᥘᥩᥒᥳ ᥙᥣᥰ ᥟᥦᥐᥱ ᥛᥦᥐᥱ ᥑᥨᥝᥴ，ᥟᥝ ᥚᥣᥲ ᥞᥨᥛᥱ ᥑᥨᥝᥰ ᥘᥩᥢᥰ，ᥛᥨᥝᥲ ᥑᥣᥒᥴ ᥟᥣᥒᥱ ᥝᥣᥢᥱ ᥖᥒᥰ ᥑᥝᥲ ᥔᥣᥢᥴ ᥞᥦᥴ ᥞᥨᥝᥲ ᥑᥣᥭᥰ ᥖᥭᥱ ᥖᥣᥒᥰ ᥐᥣᥱ ᥞᥝᥳ。ᥐᥣᥱ ᥗᥪᥒᥴ ᥐᥣᥒ ᥖᥣᥒᥰ，ᥐᥨᥝᥳ ᥘᥩᥒᥳ ᥖᥣᥢᥲ ᥖᥨᥝᥱ ᥓᥣᥭᥰ ᥝᥣ：“ᥓᥣᥭᥰ，ᥞᥣᥒᥰ ᥞᥣᥰ ᥓᥣᥛᥰ ᥐᥤ ᥞᥨᥝᥱ ᥜᥢᥰ ᥗᥨᥝᥱ ᥞᥣᥰ ᥕᥥᥛᥲ ᥘᥧ，ᥜᥢᥰ ᥗᥨᥝᥱ ᥞᥣᥰ ᥐᥩᥲ ᥛᥫᥢᥴ ᥐᥢ ᥘᥭᥴ？”ᥐᥨᥝᥳ ᥓᥣᥭᥰ ᥟᥛᥱ ᥑᥬᥲ ᥟᥥᥢᥲ ᥟᥩᥢᥲ，ᥛᥢᥰ ᥑᥣᥢᥴ ᥝᥣ；“ᥕᥒ ᥖᥙ ᥕᥥᥛᥲ ᥞᥝᥳ，ᥜᥢᥰ ᥗᥨᥝᥱ ᥖᥩ ᥛᥫᥢᥴ ᥐᥢ。”ᥐᥩᥭᥰ ᥝᥣ ᥐᥨᥝᥳ ᥘᥩᥒᥳ ᥟᥛᥱ ᥓᥧᥰ，ᥞᥥᥖᥱ ᥞᥪᥴ ᥐᥩᥲ ᥝᥣ ᥖᥤᥴ ᥐᥤ ᥖᥨᥭᥰ，ᥐᥨᥝᥳ ᥓᥣᥭᥰ ᥟᥛᥱ ᥘᥫᥴ ᥘᥭᥲ ᥐᥩᥭᥰ ᥘᥭᥲ ᥟᥝ ᥞᥬᥲ ᥛᥢᥰ ᥐᥣᥱ ᥐᥤ ᥖᥨᥭᥰ。ᥐᥨᥝᥳ ᥘᥩᥒᥳ ᥐᥤ ᥕᥤᥛᥲ ᥞᥦᥴ ᥔᥛᥳ ᥕᥤᥙᥴ ᥛᥣᥰ ᥐᥤᥢ。ᥟᥬᥰ! ᥗᥨᥝᥱ ᥓᥣᥭᥰ ᥖᥧ ᥙᥥᥳ ᥛᥣᥰ ᥝᥣᥢᥴ ᥑᥭᥳ! ᥗᥨᥝᥱ ᥐᥝ ᥔᥛᥳ ᥟᥛᥱ ᥝᥣᥢᥴ？ᥛᥤ ᥖᥧ ᥞᥪᥴ ᥞᥥᥖᥱ ᥘᥭᥳ？ᥞᥪᥴ ᥐᥩᥲ ᥗᥨᥝᥱ ᥓᥣᥭᥰ ᥖᥧ ᥑᥫᥐ ᥔᥤᥴ ᥗᥨᥝᥱ ᥐᥝ，ᥐᥝ ᥘᥨᥝᥱ ᥖᥒᥰ ᥛᥢᥰ ᥘᥦᥐ ᥐᥢ。ᥛᥢᥰ ᥑᥬᥲ ᥓᥬ ᥔᥤᥴ ᥓᥝᥱ ᥖᥫᥳ ᥓᥣᥭᥰ ᥑᥝᥴ ᥖᥣᥢᥲ ᥞᥝᥳ。ᥓᥣᥭᥰ ᥑᥝᥴ ᥝᥣ：“ᥜᥢᥰ ᥗᥨᥝᥱ ᥐᥩᥭᥰ ᥛᥫᥢᥴ ᥐᥢ，ᥕᥒ ᥖᥙ ᥘᥦᥐ ᥞᥝᥳ。”ᥐᥩᥭᥰ ᥝᥣ ᥘᥩᥒᥳ ᥓᥣᥭᥰ ᥕᥒ ᥓᥧᥰ，ᥖᥩ ᥐᥩᥭᥰ ᥘᥭᥲ ᥘᥦᥐ ᥞᥬᥲ ᥞᥝᥳ。ᥐᥨᥝᥳ ᥘᥩᥒᥳ ᥘᥦᥐ ᥘᥭᥲ ᥞᥦᥴ ᥗᥢᥱ ᥓᥨᥛᥰ ᥘᥨᥒᥴ ᥓᥨᥛᥰ ᥘᥣᥒᥴ。ᥐᥩᥭᥰ ᥝᥣ，ᥖᥒᥰ ᥔᥩᥒᥴ ᥙᥤ ᥘᥩᥒᥳ ᥕᥒ ᥞᥧᥳ ᥐᥩᥲ ᥕᥒ ᥗᥣᥒᥱ ᥓᥨᥝᥲ，ᥜᥢᥰ ᥗᥨᥝᥱ ᥟᥢ ᥛᥥ ᥑᥝᥴ ᥞᥬᥲ ᥐᥨᥝᥳ ᥛᥤ ᥓᥣᥭᥰ ᥘᥢᥳ ᥙᥩᥰ ᥙᥥᥢ ᥗᥨᥝᥱ ᥑᥨᥝᥲ ᥞᥝᥳ。

ᥔᥩᥒᥴ ᥑᥣᥴ ᥙᥤ ᥘᥩᥒᥳ ᥟᥩᥢ ᥐᥢ ᥙᥭ ᥗᥪᥒᥴ ᥔᥨᥢᥴ ᥞᥭ ᥐᥣᥱᥔᥥᥴ，ᥖᥩ ᥞᥥᥖᥱ ᥓᥝᥳ ᥕᥣᥢᥴ ᥑᥛ ᥑᥧ ᥞᥭ ᥗᥭᥴ ᥔᥨᥢᥴ，ᥟᥝ ᥗᥨᥝᥱ ᥖᥦᥢᥰ ᥖᥨᥐᥱ ᥐᥣᥱ ᥛᥦᥢᥳ ᥞᥝᥳ。ᥘᥭᥲ ᥔᥥ ᥔᥣᥝᥰ ᥙᥣᥭ ᥝᥢᥰ，ᥗᥨᥝᥱ ᥐᥨᥝᥳ ᥙᥤ ᥓᥣᥭᥰ ᥖᥦᥢᥰ ᥘᥢᥳ ᥞᥩᥐᥱ ᥒᥩᥐᥳ ᥛᥣᥰ ᥛᥦᥢᥳ ᥞᥝᥳ，ᥛᥢᥰ ᥘᥭᥲ ᥙᥩᥐ ᥝᥣᥭᥱ ᥑᥪᥢᥰ ᥞᥫᥢᥰ ᥞᥝᥳ。ᥛᥤ ᥓᥣᥭᥰ ᥝᥣᥭᥱ ᥙᥩᥐ ᥑᥪᥢᥰ ᥞᥫᥢᥰ ᥔᥥᥴ，ᥐᥨᥝᥳ ᥘᥩᥒᥳ ᥟᥩᥐᥱ ᥓᥬ ᥘᥤ ᥐᥨᥝ ᥛᥣᥰ ᥕᥬᥰ ᥕᥬᥰ。ᥐᥩᥭᥰ ᥝᥣ，ᥛᥢ ᥖᥤᥴ ᥑᥪᥢᥰ ᥞᥫᥢᥰ ᥐᥩᥰ ᥔᥛᥳ ᥐᥨᥝ ᥛᥥ ᥑᥝᥴ ᥓᥣᥳ ᥘᥣᥱ，ᥐᥩᥭᥰ ᥘᥭᥲ ᥐᥢᥲ ᥞᥥᥖᥱ ᥓᥬ ᥕᥬᥱ ᥞᥦᥴ，ᥗᥣᥲ ᥞᥬᥲ ᥗᥨᥝᥱ ᥟᥩᥐᥱ ᥒᥩᥐᥱ ᥞᥝᥳ。

ᥕᥣᥛᥰ ᥝᥢᥰ ᥖᥤᥴ ᥖᥨᥐ ᥑᥝᥲ ᥘᥩᥭ ᥐᥣᥱ ᥘᥢᥳ，ᥛᥤᥰ ᥔᥫᥴ ᥘᥣᥲ ᥞᥝᥲ ᥘᥨᥒᥴ ᥖᥨᥝ ᥘᥫᥒ ᥖᥩᥒᥳ ᥙᥝᥱ ᥓᥨᥒᥴ ᥑᥨᥒᥴ ᥘᥨᥒᥴ ᥗᥪᥒᥴ ᥔᥨᥢᥴ ᥞᥭ ᥛᥣᥰ，ᥕᥣᥰ ᥞᥢᥴ ᥟᥣᥭᥲ ᥛᥬᥳ ᥔᥨᥢᥴ ᥗᥨᥝᥱ，ᥗᥢᥱ ᥘᥥᥰ ᥘᥤᥢᥳ ᥘᥣᥙ ᥘᥣᥙ ᥘᥨᥒᥴ。ᥐᥨᥝᥳ ᥘᥩᥒᥴ ᥞᥢᥴ ᥔᥫᥴ ᥞᥦᥴ ᥐᥤᥲ ᥞᥩ ᥘᥦᥢ ᥘᥦᥢ ᥞᥩᥒᥳ ᥞᥩᥒᥳ：“ᥐᥨᥝ ᥞᥧᥰ! ᥞᥧᥰ! ……”ᥐᥩᥭᥰ ᥝᥣ ᥛᥢᥰ ᥞᥩᥒᥳ ᥖᥣᥭ ᥞᥩᥒᥳᥘᥤᥙᥴ ᥐᥩᥰ ᥓᥣᥭᥰ ᥑᥝᥴ ᥕᥒ ᥘᥭᥲ ᥕᥤᥢᥰ。ᥛᥢᥰ ᥐᥩᥲ ᥕᥒ ᥘᥦᥢ ᥙᥨᥢᥳ ᥘᥭᥲ ᥔᥫᥴ，ᥓᥨᥝ ᥔᥫᥴ ᥑᥨᥙᥱ ᥐᥤᥢ ᥞᥝᥳ。

ᥝᥣᥭᥰ ᥘᥒᥴ ᥛᥣᥰ ᥙᥫᥢ ᥓᥒᥱ ᥞᥧᥳ，ᥛᥥ ᥑᥝᥴ ᥑᥬᥲ ᥑᥣᥭᥱ ᥘᥧᥐ ᥓᥣᥭᥰ ᥛᥥ ᥟᥩᥢ ᥖᥣᥭ，ᥟᥝ ᥜᥢᥰ ᥗᥨᥝᥱ ᥛᥥᥝᥰ ᥑᥨᥝᥲ ᥔᥧᥐᥴ ᥘᥢᥳ ᥞᥬᥲ ᥐᥨᥝᥳ ᥙᥤ ᥓᥣᥭᥰ，ᥟᥝ ᥜᥢᥰ ᥗᥨᥝᥱ ᥘᥤᥙᥴ ᥞᥬᥲ ᥐᥨᥝᥳ ᥘᥩᥒᥳ。ᥐᥨᥝᥳ ᥘᥩᥒᥳ ᥔᥛᥳ ᥘᥦᥐ ᥜᥢᥰ ᥗᥨᥝᥱ ᥓᥣᥭᥰ ᥑᥝᥴ……

ᥐᥨᥝᥳ ᥘᥩᥒᥳ ᥖᥣᥭ ᥔᥥᥴ ᥙᥦᥢᥱ ᥙᥥᥢ ᥘᥨᥐ ᥟᥩᥢᥱ ᥛᥣᥰ ᥖᥨᥝ ᥘᥫᥒ，ᥞᥩᥒᥳ “ᥐᥨᥝ ᥞᥧᥰ! ᥐᥨᥝ ᥞᥧᥰ! ”ᥕᥬᥰ ᥕᥬᥰ。ᥙᥫ ᥘᥭᥴ ᥙᥫᥢ ᥓᥒᥱ ᥚᥨᥝᥱ ᥓᥪ “ᥘᥨᥐ ᥐᥨᥝ ᥞᥧᥰ。”ᥚᥩᥒᥰ ᥕᥣᥛᥰ ᥛᥢᥰ ᥞᥩᥒᥳ ᥛᥣᥰ ᥘᥢᥳᥓᥝᥱ ᥙᥥᥢ ᥑᥤᥒᥱ ᥕᥣᥛᥰ ᥔᥫᥴ ᥘᥪᥙ ᥐᥤᥢ ᥛᥢᥰ ᥘᥢᥳ ᥞᥝᥳ。

ᥛᥩᥐᥱ ᥑᥛᥰ ᥟᥣᥭᥲ ᥓᥥᥙᥱ ᥞᥩᥛᥴ