ᥟᥩᥐᥱ ᥛᥣᥐᥱ

ᥟᥩᥐᥱ ᥛᥣᥐᥱ

ᥟᥩᥐᥱ ᥛᥣᥐᥱ (ʼǒak mǎak)

"ᥑᥤᥒᥱ ᥞᥝᥳ ᥕᥣᥛᥰ ᥛᥭᥲ，ᥐᥨᥢᥰ ᥐᥭᥳ ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ，ᥘᥨᥝᥱ ᥓᥩᥒᥰ ᥓᥥᥰ ᥞᥥᥳ ᥜᥣᥒᥳ ᥘᥤ ᥘᥤ，ᥚᥤ ᥚᥣ ᥐᥣᥱ ᥖᥦᥒᥰ ᥑᥥᥛᥴ ᥞᥥᥳ ᥜᥣᥒᥳ ᥘᥣᥰ。"

ᥟᥩᥐᥱ ᥛᥣᥐᥱ ᥙᥥᥢ ᥟᥣᥱ ᥘᥣᥱ ᥔᥒᥴ？

ᥟᥩᥐᥱ ᥛᥣᥐᥱ ᥙᥥᥢ ᥟᥣᥱ ᥘᥣᥱ ᥛᥨᥝᥴ ᥔᥩᥢᥳ ᥓᥙᥴ ᥐᥢ ᥟᥢ ᥙᥥᥢ ᥟᥫᥐᥱ (virus) ᥓᥨᥝᥲ ᥓᥙᥴ ᥓᥨᥝᥲ ᥛᥦᥒᥰ ᥑᥭᥲ ᥟᥩᥐᥱ ᥛᥣᥐᥱ、ᥟᥩᥐᥱ ᥚᥩᥙᥱ ᥞᥦᥴ ᥕᥥᥢᥰ ᥙᥥᥢ ᥛᥣᥰ ᥘᥢᥳ，ᥖᥣᥒᥰ ᥙᥥᥢ ᥙᥥᥢ ᥘᥭᥲ ᥑᥢᥴ、ᥓᥙᥴ ᥐᥢ ᥒᥣᥭ，ᥟᥣ ᥓᥩᥒᥰ ᥟᥣᥱ ᥘᥣᥱ ᥛᥤᥰ ᥘᥫᥳ ᥛᥭᥲ、ᥟᥩᥐᥱ ᥖᥧᥛᥱ ᥘᥛᥳ ᥑᥨᥛᥰ，ᥘᥧᥐ ᥟᥩᥢᥱ ᥟᥣ ᥔᥣᥐ ᥘᥭᥲ 15 ᥙᥤ ᥘᥨᥒᥰ ᥖᥬᥲ ᥘᥢᥳ ᥓᥙᥴ ᥒᥣᥭ ᥙᥥᥢ ᥒᥣᥭ ᥔᥤᥴ ᥙᥫᥢ。

ᥐᥨᥢᥰ ᥚᥩᥒᥰ ᥝᥣ ᥘᥭᥲ ᥐᥨᥝᥱ ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ ᥛᥣᥰ，ᥕᥣ ᥞᥣᥭᥴ ᥞᥦᥴ，ᥛᥦᥒᥰ ᥑᥭᥲ ᥐᥩᥲ ᥛᥨᥝᥴ ᥖᥥᥖᥱ ᥔᥩᥢ ᥘᥬᥰ ᥔᥣᥭᥴ ᥗᥣᥖ ᥔᥣᥭᥴ ᥑᥦᥖᥱ ᥘᥬᥰ ᥖᥨᥝ ᥑᥤᥒᥰ ᥐᥨᥢᥰ ᥘᥢᥳ，ᥗᥣᥲ ᥛᥣᥱ ᥞᥦᥒᥰ ᥞᥥᥳ ᥑᥖᥴ ᥟᥣᥱ ᥘᥣᥱ ᥖᥒᥰ ᥛᥦᥒᥰ ᥑᥭᥲ ᥛᥦᥒᥰ ᥘᥣᥝᥴ ᥟᥨᥢᥲ ᥓᥩᥙ ᥛᥣᥰ，ᥛᥣᥝᥱ ᥘᥢᥴ ᥟᥣ ᥔᥣᥐ ᥕᥬᥱ ᥛᥣᥰ，ᥛᥦᥒᥰ ᥑᥭᥲ ᥛᥨᥝᥴ ᥗᥣᥰ ᥛᥣᥰ，ᥐᥨᥢᥰ ᥓᥝᥱ ᥛᥨᥝᥴ ᥘᥭᥲ ᥖᥣᥒᥰ ᥙᥥᥢ ᥟᥩᥐᥱ ᥚᥩᥙᥱ。

ᥛᥦᥒᥰ ᥑᥭᥲ ᥟᥩᥐᥱ ᥛᥣᥐᥱ ᥞᥥᥖᥱ ᥞᥪᥴ ᥔᥩᥢᥳ ᥓᥙᥴ ᥐᥢ？

ᥐᥨᥢᥰ ᥙᥥᥢ ᥛᥨᥝᥴ ᥟᥝ ᥖᥣᥒᥰ ᥙᥥᥢ ᥔᥩᥒᥳ ᥓᥙᥴ ᥞᥬᥝ ᥙᥫᥢ，ᥕᥧᥱ ᥕᥣᥛᥰ ᥛᥦᥒᥰ ᥑᥭᥲ ᥖᥥᥖᥱ ᥔᥩᥢ ᥖᥨᥝᥱ ᥗᥪᥒᥴ ᥟᥣᥱ ᥘᥣᥱ ᥙᥨᥝᥱ ᥙᥥᥢ ᥛᥣᥰ，ᥖᥣᥒᥰ ᥙᥥᥢ ᥖᥨᥝ ᥛᥨᥝᥴ ᥔᥩᥢᥳ ᥓᥙᥴ ᥞᥬᥲ ᥐᥢ，ᥖᥣᥒᥰ ᥙᥥᥢ ᥓᥩᥛᥰ ᥘᥛᥳ ᥘᥣᥭᥰ、ᥟᥭ、ᥔᥤᥴ ᥓᥣᥛ ᥔᥩᥢᥳ ᥓᥙᥴ ᥞᥬᥲ ᥙᥫᥢ，ᥘᥪᥒᥴ ᥓᥨᥝᥲ ᥖᥧᥛᥱ ᥘᥛᥳ ᥑᥨᥛᥰ ᥖᥒᥰ ᥚᥣᥲ ᥓᥥᥖ、ᥚᥣᥲ ᥞᥨᥛᥱ ᥑᥨᥝᥰ ᥘᥩᥢᥰ ᥟᥢ ᥛᥦᥒᥰ ᥑᥭᥲ ᥟᥫᥐᥱ ᥛᥣᥐᥱ ᥓᥨᥝᥲ ᥘᥢᥳ ᥐᥩᥲ ᥛᥨᥝᥴ ᥓᥙᥴ ᥓᥨᥝᥲ ᥖᥣᥒᥰ ᥙᥥᥢ。

ᥘᥧᥐ ᥟᥩᥢᥱ ᥘᥭᥲ ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ ᥒᥣᥭ，ᥐᥩᥭᥰ ᥝᥣ ᥑᥫᥒ ᥙᥣᥲ ᥘᥛᥴ ᥕᥒ ᥙᥥᥢ ᥞᥦᥒᥰ ᥑᥬ。ᥐᥨᥢᥰ ᥘᥧᥛᥱ ᥘᥭᥲ ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ ᥛᥣᥰ，ᥛᥨᥝᥴ ᥙᥥᥢ ᥞᥦᥒᥰ ᥔᥤᥴ ᥘᥧᥐ ᥟᥩᥢᥱ，ᥓᥫᥰ ᥛᥣᥱ ᥞᥦᥒᥰ ᥞᥥᥳ ᥑᥖᥴ ᥛᥦᥒᥰ ᥑᥭᥲ ᥖᥒᥰ ᥟᥣᥱ ᥘᥣᥱ ᥟᥨᥢᥲ ᥘᥢᥳ ᥛᥨᥝᥴ ᥘᥭᥲ ᥖᥣᥒᥰ ᥙᥥᥢ ᥙᥩᥖᥱ ᥓᥥᥙᥱ ᥙᥩᥖᥱ ᥞᥨᥒᥰ、ᥟᥩᥐᥱ ᥟᥦᥐᥰ ᥙᥥᥢ ᥓᥥᥙᥱ ᥓᥫᥰ ᥘᥭᥳ ᥓᥩᥛᥰ ᥗᥦᥢᥲ，ᥛᥨᥝᥴ ᥞᥥᥖᥱ ᥞᥬᥲ ᥐᥨᥢᥰ ᥖᥣᥭ ᥐᥩᥙ。ᥙᥫ ᥘᥭᥴ，ᥟᥩᥐᥱ ᥛᥣᥐᥱ ᥛᥣᥰ，ᥘᥨᥝᥱ ᥑᥢᥴ ᥚᥣᥭᥴ ᥕᥣ ᥞᥣᥭᥴ ᥞᥣᥭᥴ，ᥕᥣᥱ ᥞᥬᥲ ᥖᥣᥒᥰ ᥙᥥᥢ ᥖᥣᥒᥱ ᥛᥥᥝᥰ ᥙᥥᥢ ᥓᥩᥛᥰ ᥗᥦᥢᥲ。

ᥖᥤᥴ ᥞᥪᥴ ᥞᥥᥳ ᥜᥣᥒᥳ ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ？

• ᥘᥫᥒ：ᥘᥧᥐ ᥞᥥᥢᥰ ᥘᥨᥝᥱ ᥞᥥᥖᥱ ᥗᥪᥒᥴ ‘’ᥔᥤᥱ ᥛᥥᥝᥰ ᥘᥛᥴ ᥛᥥᥝᥰ ᥘᥦᥒ ᥟᥥᥱ‘’，ᥓᥝᥱ ᥓᥬ ᥝᥣ ᥟᥩᥒᥲ ᥔᥝᥰ ᥐᥭᥳ ᥙᥩᥭᥱ ᥘᥨᥛᥰᥘᥩᥒ，ᥐᥭᥳ ᥔᥧᥐ ᥛᥪᥰ，ᥖᥫᥰ ᥐᥤᥢ ᥘᥛᥳ，ᥐᥭᥳ ᥘᥦᥢᥱ ᥖᥨᥝ ᥑᥤᥒᥰ，ᥕᥩᥛᥰ ᥐᥣᥱ ᥟᥩᥒᥲ ᥙᥣᥒ ᥛᥨᥢ ᥘᥛᥴ。
• ᥔᥩᥒᥴ：ᥖᥧᥛᥱ ᥘᥛᥳ ᥑᥨᥛᥰ ᥞᥦᥒᥰ ᥛᥣᥰ，ᥙᥭᥱ ᥐᥣᥱ ᥖᥫᥢᥱ ᥐᥣᥱ ᥝᥐ，ᥐᥨᥝ ᥛᥦᥒᥰ ᥑᥭᥝ ᥟᥫᥐᥱ ᥛᥣᥐᥱ ᥓᥨᥝᥲ ᥞᥩᥭᥰ ᥓᥥᥙᥱ ᥞᥦᥴ，ᥝᥣᥭᥰ ᥘᥒᥴ ᥛᥣᥰ ᥛᥨᥝᥴ ᥙᥥᥢ ᥞᥩᥭᥰ ᥙᥦᥝᥲ。
• ᥔᥣᥛᥴ：ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ ᥔᥩᥢᥳ ᥓᥙᥴ ᥐᥢ ᥒᥣᥭ，ᥗᥪᥒᥴ ᥝᥣ ᥘᥧᥐ ᥟᥩᥢᥱ ᥘᥫᥳ ᥛᥭᥲ (fever)、ᥟᥩᥐᥱ ᥖᥧᥛᥱ (rash) ᥘᥛᥳ ᥑᥨᥛᥰ ᥛᥣᥰ，ᥘᥨᥝᥱ ᥟᥩᥢ ᥐᥣᥱ ᥔᥥᥰ ᥕᥨᥒᥱ ᥑᥢᥲ ᥚᥣᥖᥱ ᥞᥦᥴ ᥕᥣ ᥑᥢᥴ ᥑᥢᥴ，ᥙᥭᥱ ᥟᥩᥢ ᥐᥣᥱ ᥘᥥᥱ ᥐᥣᥱ ᥟᥥᥢᥲ，ᥐᥩᥲ ᥕᥩᥛᥰ ᥟᥧᥛᥲ ᥕᥩᥛᥰ ᥟᥥᥢᥲ ᥘᥧᥐ ᥟᥩᥢᥱ ᥑᥩᥒ ᥘᥫᥒ。
• ᥔᥤᥱ：ᥑᥢᥲ ᥚᥣᥖᥱ ᥕᥣ ᥞᥬᥲ ᥖᥧᥛᥱ ᥘᥛᥳ ᥑᥨᥛᥰ ᥞᥦᥒᥲ ᥙᥥᥢ ᥑᥣᥙ ᥞᥦᥴ，ᥘᥧᥐ ᥟᥩᥢᥱ ᥖᥤᥴ ᥐᥣᥱ ᥟᥝ ᥘᥣᥭᥰ ᥘᥨᥝᥱ ᥞᥬᥲ ᥑᥨᥒᥳ ᥜᥫᥐᥱ ᥓᥦᥖ ᥕᥥᥛᥲ ᥟᥛᥱ ᥙᥥᥢ ᥔᥒᥴ ᥞᥦᥴ ᥓᥒᥱ ᥐᥣᥱ ᥘᥬᥰ ᥑᥨᥒᥳ ᥜᥫᥐᥱ ᥟᥝ ᥘᥣᥭᥰ ᥘᥭᥲ。
• ᥞᥣᥲ：ᥑᥨᥒᥳ ᥜᥫᥐᥱ ᥘᥨᥝᥱ ᥐᥭᥳ ᥕᥥᥛᥲ ᥘᥧᥐ ᥞᥥᥢᥰ ᥘᥭᥲ ᥟᥛᥱ ᥘᥭᥲ ᥖᥣᥒᥰ ᥙᥥᥢ ᥛᥥᥝᥰ ᥛᥨᥝᥴ ᥔᥩᥒᥳ ᥓᥙᥴ ᥞᥬᥲ ᥐᥢ ᥘᥢᥳ，ᥐᥭᥳ ᥓᥦᥖ ᥕᥥᥛᥲ ᥖᥨᥝ ᥑᥤᥒᥰ ᥘᥧᥐ ᥞᥥᥒᥰ，ᥞᥧᥳ ᥝᥣ ᥛᥤᥰ ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ ᥛᥣᥰ，ᥘᥨᥝᥱ ᥑᥢᥴ ᥚᥬᥰ ᥛᥩᥐᥱ ᥞᥬᥲ ᥜᥣᥭᥱ ᥐᥣᥢ ᥓᥫᥰ ᥓᥣᥙ ᥓᥣᥰ ᥓᥨᥝᥲ ᥘᥢᥳ。
• ᥞᥨᥐᥱ：ᥖᥦᥒᥰ ᥑᥥᥛᥴ ᥞᥥᥳ ᥜᥣᥒᥳ ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ ᥙᥥᥢ ᥛᥦᥒᥱ ᥕᥣᥱ ᥞᥥᥳ ᥜᥣᥒᥳ ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ ᥟᥢ ᥘᥤ ᥔᥤᥴ ᥛᥫᥢ ᥘᥢᥳ，ᥖᥦᥒᥰ ᥑᥥᥛᥴ ᥞᥦᥴ，ᥓᥣᥒ ᥞᥥᥳ ᥜᥣᥒᥳ ᥞᥬᥲ ᥘᥧᥐ ᥟᥩᥢᥱ ᥟᥛᥱ ᥘᥭᥲ ᥖᥣᥒᥰ ᥙᥥᥢ ᥟᥩᥐᥱ ᥛᥣᥐᥱ，ᥘᥧᥐ ᥟᥩᥒᥱ ᥕᥬᥱ ᥛᥣᥰ ᥐᥩᥲ ᥛᥨᥝᥴ ᥕᥩᥛᥰ ᥘᥭᥲ ᥖᥣᥒᥰ ᥙᥥᥢ ᥟᥩᥐᥱ ᥚᥩᥙᥱ。ᥕᥣᥛᥰ ᥟᥣᥱ ᥘᥣᥱ ᥙᥥᥢ ᥞᥦᥒᥰ ᥗᥣᥰ ᥞᥦᥒᥰ ᥘᥢᥳ，ᥐᥩᥲ ᥖᥦᥒᥰ ᥑᥥᥛᥴ ᥞᥥᥳ ᥜᥣᥒᥳ ᥘᥭᥲ ᥕᥧᥱ，ᥓᥣᥒ ᥞᥬᥲ ᥐᥨᥢᥰ ᥕᥩᥛᥰ ᥙᥥᥢ ᥖᥧᥛᥱ ᥘᥛᥳ ᥑᥨᥛᥰ，ᥟᥩᥐᥱ ᥛᥣᥐᥱ ᥛᥣᥰ，ᥟᥣᥱ ᥘᥣᥱ ᥐᥩᥲ ᥛᥝ ᥑᥩᥒ ᥘᥫᥒ。