ᥟᥤᥒ ᥔᥢᥱ ᥛᥫᥒᥰ ᥛᥣᥢ (2025 ᥙᥤ)
2025 ᥙᥤ ᥘᥫᥢ 3 ᥘᥭᥲ 28 ᥝᥢᥰ ᥐᥣᥒ ᥝᥢᥰ 2 ᥘᥣᥱ ᥘᥤᥱ 20 ᥛᥣᥱ ᥘᥥᥖ，ᥕᥧᥱ ᥛᥫᥒᥰ ᥛᥣᥢ （ᥙᥫᥲ ᥝᥧᥭᥰ 21.85 ᥖᥧᥱ，ᥖᥧᥒ ᥓᥤᥢ 95.95 ᥖᥧᥱ）ᥙᥨᥝᥱ ᥙᥥᥢ ᥚᥥᥰ ᥟᥤᥒ ᥔᥢᥱ ᥟᥢ ᥖᥣᥒᥰ ᥞᥦᥒᥰ ᥛᥢᥰ ᥛᥤᥰ 7 ᥙᥣᥭ 9 ᥓᥤᥲ ᥘᥢᥳ，ᥟᥤᥒ ᥔᥢᥱ ᥖᥣᥒᥰ ᥘᥫᥐ ᥛᥢᥰ ᥛᥤᥰ 30 ᥘᥐᥴ，ᥕᥣᥢᥴ ᥑᥩᥙᥱ ᥘᥦᥢ ᥖᥥᥒᥰ ᥛᥫᥒᥰ ᥑᥥᥱ ᥟᥩᥒᥲ ᥐᥬᥲ ᥔᥤᥴ ᥙᥫᥢ ᥘᥢᥳ 294 ᥘᥐᥴ，ᥘᥬᥰ ᥓᥫᥝ ᥞᥝᥰ ᥖᥨᥝ ᥔᥢᥱ ᥞᥦᥒᥰ ᥖᥥᥳ。
ᥚᥥᥰ ᥟᥤᥒ ᥔᥢᥱ ᥙᥨᥝᥱ ᥙᥥᥢ ᥞᥦᥴ，ᥔᥫᥢᥰ ᥝᥧᥭᥰ ᥔᥫᥢᥰ ᥓᥫᥢᥱ ᥜᥧᥰ，ᥓᥫᥝ ᥝᥧᥭᥰ ᥓᥫᥝ ᥓᥫᥢᥱ ᥜᥧᥰ ᥐᥦᥢᥱ ᥛᥣᥖ ᥘᥐᥴ ᥖᥥᥳ ᥖᥥᥳ，ᥓᥤ ᥓᥨᥝ ᥑᥙ ᥟᥣᥢᥰ ᥐᥣᥢ ᥓᥤᥝᥱ ᥚᥥᥰ ᥐᥧ ᥛᥥᥝᥰ。ᥕᥫᥢᥳ ᥛᥤᥢᥳ ᥓᥫᥢᥱ ᥜᥧᥰ ᥖᥬᥲ ᥑᥨᥒᥰ ᥓᥫᥝ ᥓᥩᥛᥰ ᥘᥒᥱ ᥘᥫᥢ 3 ᥘᥭᥲ 28 ᥝᥢᥰ ᥛᥫᥒᥰ ᥛᥣᥢ ᥙᥨᥝᥱ ᥙᥥᥢ ᥚᥥᥰ ᥟᥤᥒ ᥔᥢᥱ 7 ᥙᥣᥭ 9 ᥓᥤᥲ ᥘᥭᥳ ᥑᥢᥴ ᥚᥣᥭᥴ ᥑᥙ ᥟᥣᥢᥰ，ᥚᥣᥭᥱ ᥟᥩᥐᥱ ᥜᥧᥒᥴ ᥙᥩᥒ ᥐᥣᥢ ᥓᥤᥳ ᥘᥥᥴ ᥓᥤᥝᥱ ᥚᥥᥰ ᥟᥤᥒ ᥔᥢᥱ ᥟᥢ ᥞᥬᥲ ᥓᥫᥝ ᥝᥧᥭᥰ ᥔᥣᥒᥳ ᥝᥧᥭᥰ、ᥔᥣᥒᥳ ᥝᥧᥱ ᥓᥫᥝ ᥓᥣᥒᥰ、ᥓᥪᥰ ᥑᥧᥭ ᥓᥣᥒᥰ ᥘᥬᥰ ᥓᥧᥛᥰ ᥓᥤᥳ ᥘᥥᥴ ᥑᥖᥴ ᥑᥥᥒᥱ ᥓᥤᥝᥱ ᥐᥧᥴ ᥚᥥᥰ ᥟᥤᥒ ᥔᥢᥱ ᥟᥢ ᥙᥥᥢ ᥓᥝᥱ ᥖᥧᥒ ᥛᥫᥭᥳ ᥞᥥᥖᥱ ᥓᥧᥰ ᥓᥣᥒᥰ ᥘᥢᥳ ᥑᥢᥴ ᥚᥣᥭᥴ ᥐᥣᥱ ᥙᥩᥒ ᥐᥣᥢ ᥓᥤᥝᥱ ᥚᥥᥰ ᥟᥤᥒ ᥔᥢᥱ。
ᥘᥫᥢ 3 ᥘᥭᥲ 29 ᥝᥢᥰ ᥐᥣᥒ ᥘᥬᥴ 9 ᥘᥤᥱ 30 ᥛᥣᥱ ᥘᥥᥖ，ᥜᥧᥒᥴ ᥑᥥᥴ ᥚᥥᥰ ᥐᥥᥝᥱ ᥕᥣᥐ ᥘᥣᥢᥳ ᥗᥦᥢ ᥓᥥᥝᥱ ᥕᥦᥢᥳ ᥖᥧᥭᥱ ᥛᥫᥒᥰ ᥕᥤᥢᥳ ᥘᥣᥢᥳ ᥖᥤ ᥖᥫᥒᥰ ᥓᥨᥒ ᥐᥨᥝᥲ ᥟᥢ ᥙᥦᥒᥱ ᥕᥣᥱ ᥐᥖ ᥖᥩᥢᥰ、ᥛᥨᥝᥴ ᥑᥥᥴ ᥚᥥᥰ ᥐᥥᥝᥱ ᥕᥣᥐ ᥘᥢᥳ 16 ᥐᥨᥝᥳ ᥙᥣᥰ ᥑᥫᥒ ᥓᥣᥐ、ᥗᥨᥒᥴ ᥕᥣᥲ ᥕᥣ、ᥑᥫᥒ ᥗᥣᥖ ᥑᥫᥒ ᥖᥩᥒᥱ，ᥑᥫᥒ ᥞᥥᥖᥱ ᥐᥣᥢ ᥞᥦᥴ，ᥘᥧᥐ ᥛᥫᥒᥰ ᥛᥣᥝᥰ ᥑᥝᥲ ᥛᥫᥒᥰ ᥛᥣᥢ ᥐᥣᥱ，ᥖᥤᥴ ᥐᥣᥱ ᥓᥩᥭ ᥗᥦᥛᥴ ᥝᥥᥒᥰ ᥛᥧᥱ ᥓᥥ ᥛᥫᥒᥰ ᥛᥣᥢ ᥑᥥᥴ ᥚᥥᥰ ᥐᥥᥝᥱ ᥕᥣᥐ。