ᥟᥣᥭᥲ ᥓᥤᥒᥱ

ᥟᥣᥭᥲ ᥓᥤᥒᥱ၊ ᥙᥥᥢ ᥐᥨᥢᥰ ᥛᥣᥢᥲ ᥝᥥᥒᥰ ᥐᥣᥒ ᥛᥫᥒᥰ ᥛᥣᥝᥰ၊ ᥙᥥᥢ ᥚᥧᥱ ᥑᥐᥴ ᥐᥭᥳ ᥓᥣᥛᥱ ᥛᥣᥐ ᥛᥤᥰ ᥐᥨᥝᥳ ᥘᥫᥒ၊ ᥟᥩᥢ ᥙᥣᥰ ᥐᥨᥢᥰ ᥖᥒᥰ ᥞᥫᥢᥰ ᥑᥣᥴ ᥔᥨᥝᥴ ᥘᥦᥛᥰ ᥒᥫᥢᥰ ᥓᥣᥛᥱ ᥛᥫ ᥝᥢᥰ၊ ᥘᥣᥲ ᥞᥫᥢᥰ ᥖᥣ ᥕᥥᥰ ᥐᥩᥲ ᥛᥣᥐ ᥛᥤᥰ ᥙᥤᥰ ᥓᥥᥰ ᥛᥣᥰ ᥘᥨᥒᥴ ᥘᥣᥒᥴ။ᥛᥢᥰ ᥕᥒᥰ ᥓᥨᥝᥲ ᥕᥨᥭᥰ ᥞᥥᥖᥱ ᥐᥨᥢᥰ ᥞᥨᥝᥴ ᥘᥬᥰ ᥛᥧᥱ ᥓᥧᥛᥰ ᥑᥫᥰ ᥖᥭᥰ ᥛᥫᥒᥰ ᥛᥣᥝᥰ ᥘᥨᥒᥴ၊ ᥟᥩᥢ ᥙᥣᥰ ᥟᥣ ᥛᥦᥰ ᥔᥩᥢᥳ ᥔᥪᥙ ᥑᥣᥐ ᥛᥥᥱ ᥝᥤᥳ ᥓᥣᥱ ᥗᥧᥒᥰ ᥓᥣᥛᥱ ᥖᥭᥰ။

ᥛᥣᥢᥲ ᥝᥥᥒᥰ ᥐᥣᥒ ᥕᥧᥱ ᥓᥨᥝᥲ ᥙᥣᥲ ᥝᥢᥰ ᥟᥩᥐᥱ ᥖᥣᥛᥰ ᥘᥣᥲ ᥞᥩᥒᥱ ᥘᥬᥰ ᥝᥥᥒᥰ ᥛᥫᥒᥰ ᥛᥣᥝᥰ၊ ᥓᥩᥛᥰ ᥘᥭᥲ ᥓᥥ ᥝᥥᥒᥰ ᥑᥣᥐ ᥐᥣᥒᥲ ᥛᥣᥰ၊ ᥞᥭ ᥘᥣᥰ ᥖᥨᥝ ᥓᥨᥝᥲ ᥘᥬᥰ ᥘᥧᥛᥰ ᥔᥪᥳ ᥟᥝ ᥛᥦᥢᥳ ᥕᥝᥳ။ᥟᥛᥱ ᥛᥤᥰ ᥘᥣᥰ ᥞᥥᥖᥱ၊ ᥟᥣᥭᥲ ᥓᥤᥒᥱ、ᥘᥨᥢᥰ ᥕᥥᥢᥱ ᥔᥩᥒᥴ ᥙᥧᥱ ᥕᥣ ᥔᥛᥳ ᥓᥨᥝᥰ ᥓᥣᥰ ᥞᥥᥖᥱ ᥐᥣᥳ ᥑᥣᥭᥴ၊ ᥐᥣᥱ ᥛᥫᥒᥰ ᥛᥣᥢ ᥑᥣᥖ ᥞᥭ ᥘᥣᥰ ᥔᥩᥛᥲ ᥖᥦᥒ ᥜᥣᥒᥴ၊ ᥑᥣᥭᥴ ᥞᥨᥭᥱ ᥜᥢᥰ ᥖᥦᥒ ᥜᥣᥒᥴ၊ ᥝᥣᥢᥱ ᥛᥥᥲ ᥖᥦᥒ ᥜᥣᥒᥴ ᥑᥣᥭᥴ၊ ᥗᥦᥛᥴ ᥙᥫᥢ ᥔᥫᥝ ᥔᥪᥳ ᥖᥦᥒ ᥜᥣᥒᥴ၊ ᥑᥣᥭᥴ ᥕᥣᥲ ᥕᥨᥐᥱ ᥕᥣᥲ ᥕᥣ ᥖᥭᥰ၊ ᥞᥧᥒᥴ ᥘᥝᥲ ᥑᥣᥭᥴ၊ ᥖᥨᥝ ᥙᥨᥝᥰ ᥞᥥᥖᥱ ᥛᥣᥰ 20 ᥙᥣᥭ ᥙᥤ ᥕᥝᥳ။

ᥛᥫ ᥟᥩᥢ ᥖᥣᥒᥰ ᥖᥣᥒᥰ ᥙᥥᥢ ᥞᥣ ᥙᥩᥖᥱ ᥓᥥᥙᥱ ᥟᥛᥱ ᥙᥣ ᥙᥨᥝᥱ ᥙᥥᥢ ᥘᥢᥳ၊ ᥟᥣᥭᥲ ᥓᥤᥒᥱ、ᥘᥨᥢᥰ ᥕᥥᥢᥱ ᥔᥩᥒᥴ ᥑᥣᥴ ᥙᥧᥱ ᥕᥣ ᥐᥧ ᥙᥤ ᥐᥧ ᥐᥣᥱ ᥑᥣᥖ ᥞᥭ ᥘᥣᥰ ᥛᥫᥒᥰ ᥛᥣᥢ ᥔᥩᥛᥲ ᥖᥦᥒ ᥜᥣᥒᥴ ᥘᥣᥭᥴ ᥞᥥᥒᥴ ᥛᥧᥰ၊ ᥛᥣᥒ ᥙᥤ ᥔᥩᥛᥲ ᥙᥥᥢ 5000 ᥛᥧᥰ ᥑᥪᥢᥲ ᥘᥫᥴ၊ ᥛᥫ 2014 ᥙᥤ、2015 ᥙᥤ ᥕᥣᥛᥰ ᥖᥦᥒ ᥜᥣᥒᥴ ᥑᥣᥭᥴ ᥘᥤ ᥘᥢᥳ၊ ᥘᥤ ᥙᥤ ᥖᥨᥝ ᥑᥣᥴ ᥘᥭᥲ ᥒᥫᥢᥰ 200 ᥙᥣᥭ ᥛᥧᥢᥱ ᥑᥩᥭᥰ ᥑᥪᥢᥲ ᥘᥫᥴ။ᥖᥣᥒᥰ ᥙᥥᥢ ᥞᥣ ᥙᥩᥖᥱ ᥓᥥᥙᥱ ᥙᥨᥝᥱ ᥙᥥᥢ ᥞᥦᥴ၊ ᥑᥝᥲ ᥟᥩᥐᥱ ᥖᥫᥒᥰ ᥕᥣᥙᥱ၊ ᥖᥣᥒᥰ ᥐᥣᥳ ᥖᥦᥒ ᥜᥣᥒᥴ ᥐᥩᥲ ᥕᥒ ᥞᥛᥳ ᥙᥥᥢ ᥚᥧᥰ ᥕᥝᥳ၊ ᥘᥤ ᥙᥤ ᥐᥩᥭᥰ ᥔᥩᥛᥲ 200、300 ᥛᥧᥰ ᥕᥝᥳ။ᥐᥩᥭᥰ ᥛᥤᥰ ᥖᥣᥒᥰ ᥐᥣᥳ ᥜᥢᥰ ᥖᥦᥒ、ᥛᥥᥲ ᥖᥦᥒ ᥖᥫᥐ ᥘᥤ ᥑᥩᥒ ᥘᥫᥒ။ᥖᥣᥒᥰ ᥐᥣᥳ ᥖᥦᥒ ᥛᥫᥒᥰ ᥞᥝᥰ ᥟᥛᥱ ᥙᥨᥝᥰ ᥘᥤ ᥛᥣᥰ၊ ᥔᥩᥒᥴ ᥑᥣᥴ ᥚᥨᥝᥴ ᥛᥥᥰ ᥕᥒᥰ ᥐᥣᥱ ᥛᥫᥒᥰ ᥔᥤᥙᥴ ᥔᥩᥒᥴ ᥙᥢᥰ ᥘᥣᥰ ᥗᥦᥛᥴ ᥙᥫᥢ ᥔᥫᥝ ᥔᥪᥳ ᥖᥦᥒ ᥜᥣᥒᥴ၊ ᥖᥨᥝ ᥕᥣᥙᥱ ᥘᥭᥲ ᥖᥥᥳ ᥖᥥᥳ။

ᥝᥭᥳ ᥔᥤᥴ ᥞᥥᥖᥱ ᥐᥣᥳ ᥞᥦᥴ၊ ᥟᥣᥭᥲ ᥓᥤᥒᥱ ᥐᥩᥲ ᥞᥧᥳ ᥘᥭᥲ ᥕᥣᥲ ᥕᥨᥐᥱ ᥕᥣᥲ ᥕᥣ ᥖᥭᥰ ᥘᥛᥴ ᥖᥥᥳ ᥖᥥᥳ။ᥛᥢᥰ ᥘᥧᥐ ᥛᥫ ᥟᥩᥢᥱ ᥓᥝᥱ ᥙᥨᥝᥰ ᥐᥥᥐ ᥜᥫᥐᥱ ᥙᥦᥒᥱ ᥕᥣᥱ ᥜᥣᥭᥱ ᥕᥣᥲ ᥕᥨᥐᥱ ᥕᥣᥲ ᥕᥣ ᥖᥭᥰ ᥘᥭᥳ ᥕᥝᥳ၊ ᥐᥭᥳ ᥐᥭᥳ ᥐᥣᥱ ᥑᥣᥴ ᥔᥣᥱ ᥘᥣᥱ ᥕᥣᥲ ᥕᥣ ᥖᥭᥰ ᥜᥫᥐᥱ ᥘᥛᥳ ᥐᥖ ᥖᥣᥒᥰ ᥓᥣᥒ၊ ᥘᥦᥛᥰ ᥓᥣᥛᥰ ᥕᥣᥲ ᥕᥣ ᥖᥭᥰ ᥛᥣᥰ ᥕᥥᥛᥲ။ᥐᥩᥙ ᥙᥫ ᥓᥬ ᥓᥙᥴ ᥓᥬ ᥙᥣᥰ၊ ᥔᥛᥳ ᥐᥭᥳ ᥑᥣᥰ ᥓᥣᥰ၊ ᥟᥣᥭᥲ ᥓᥤᥒᥱ ᥐᥩᥲ ᥞᥧᥳ ᥘᥭᥲ ᥕᥣᥲ ᥕᥣ ᥖᥭᥰ ᥛᥣᥰ ᥘᥛᥴ ᥘᥨᥒᥴ ᥘᥛᥴ ᥘᥣᥒᥴ၊ ᥓᥣᥒ ᥞᥣᥒᥰ ᥐᥩᥭᥰ ᥘᥦᥛᥰ ᥕᥣᥲ ᥕᥨᥐᥱ ᥕᥣᥲ ᥕᥣ ᥖᥭᥰ ᥛᥣᥰ ᥑᥣᥭᥴ ᥕᥝᥳ။

ᥕᥣᥲ ᥖᥣᥛᥱ ᥖᥭᥰ ᥟᥢ ᥙᥥᥢ ᥘᥨᥒᥴ ᥓᥝᥲ ᥑᥝᥴ ᥝᥭᥳ ᥖᥨᥐᥱ ᥛᥣᥰ ᥘᥢᥳ၊ ᥗᥪᥒᥴ ᥖᥤ ᥟᥣᥭᥲ ᥓᥤᥒᥱ ᥛᥥᥰ ᥐᥨᥝᥲ ᥗᥦᥢᥲ ᥞᥦᥴ၊ ᥕᥣᥛᥰ ᥘᥭᥳ ᥙᥨᥝᥰ ᥞᥥᥖᥱ ᥙᥥᥢ ᥘᥛᥳ ᥕᥣᥲ ᥕᥣ ᥛᥣᥰ ᥕᥝᥳ၊ ᥘᥬᥰ ᥖᥫᥒᥰ ᥐᥩᥲ ᥞᥬᥲ ᥑᥣᥭᥴ ᥘᥬᥰ ᥐᥣᥖᥱ ᥔᥣᥰ ᥕᥝᥳ။ᥕᥣᥲ ᥖᥣᥛᥱ ᥖᥭᥰ၊ ᥕᥣ ᥘᥭᥲ ᥞᥩᥭᥰ ᥛᥣᥖᥱ ᥞᥩᥭᥰ ᥚᥣᥳ、ᥘᥨᥛᥳ ᥓᥨᥝᥲ ᥛᥒ ᥓᥨᥝᥲ、ᥛᥢ ᥐᥣᥱ 、ᥛᥦᥒᥰ ᥐᥣᥙ ᥕᥧᥒᥰ ᥕᥒᥱ、ᥘᥣᥲ ᥙᥥᥢ ᥔᥤᥝᥴ ᥙᥥᥢ ᥖᥧᥛᥱ ᥓᥫᥰ ᥘᥭᥳ၊ ᥙᥤ ᥘᥩᥒᥳ ᥐᥬᥲ ᥟᥥᥐᥱ ᥐᥦᥢᥱ ᥖᥨᥝ ᥐᥭᥳ ᥔᥪᥳ ᥖᥥᥳ ᥖᥥᥳ။

ᥕᥣᥲ ᥕᥨᥐᥱ ᥕᥣᥲ ᥕᥣ ᥟᥢ ᥟᥣᥭᥲ ᥓᥤᥒᥱ ᥘᥧᥐ ᥐᥧ ᥟᥪᥒᥱ ᥔᥪᥒᥱ ᥛᥫᥒᥰ ᥔᥪᥳ ᥛᥣᥰ ᥘᥢᥳ ᥐᥦᥢᥱ ᥘᥛᥴ ᥖᥩᥢᥰ၊ ᥛᥤᥰ ᥙᥨᥝᥰ ᥙᥥᥢ ᥘᥣᥭᥴ ᥔᥤᥙᥴ ᥛᥥᥝᥰ။ᥕᥣᥲ ᥕᥨᥐᥱ ᥕᥣᥲ ᥕᥣ ᥓᥫᥰ ᥘᥭᥳ၊ ᥛᥥᥝᥰ ᥘᥬ ᥙᥥᥢ ᥕᥣᥲ ᥕᥣ ᥔᥒᥴ၊ ᥘᥩᥒ ᥖᥪᥰ ᥛᥤᥰ ᥘᥛᥴ ᥑᥬ၊ ᥕᥣ ᥘᥭᥲ ᥟᥣᥱ ᥘᥣᥱ ᥔᥒᥴ၊ ᥛᥢᥰ ᥖᥨᥝ ᥞᥧᥳ ᥘᥭᥲ ᥓᥦᥛᥱ ᥓᥦᥛᥱ။ᥝᥭᥳ ᥔᥤᥴ ᥕᥣᥲ ᥖᥣᥛᥱ ᥖᥭᥰ ᥞᥦᥴ၊ ᥕᥣᥲ ᥕᥣ ᥕᥣ ᥞᥧᥰ ᥘᥒ ᥓᥥᥙᥱ、ᥛᥩᥒ ᥐᥬ、ᥘᥨᥛᥰ ᥑᥪᥢᥲ ᥘᥨᥛᥰ ᥘᥣᥝᥴ、ᥙᥧᥰ ᥛᥣᥱ ᥗᥦᥛᥴ ᥞᥦᥒᥰ ᥐᥩᥲ ᥘᥤ ᥖᥥᥳ ᥖᥥᥳ၊ ᥙᥫᥢ ᥐᥩᥲ ᥐᥭᥳ ᥛᥣᥰ ᥔᥪᥳ ᥐᥣᥱ ᥕᥣ ᥖᥣᥒᥰ ᥙᥥᥢ။

ᥟᥣᥭᥲ ᥓᥤᥒᥱ、ᥘᥨᥢᥰ ᥕᥥᥢᥱ ᥔᥩᥒᥴ ᥙᥧᥱ ᥕᥣ ᥕᥒᥰ ᥖᥒᥲ ᥟᥩᥒᥲ ᥞᥧᥒᥴ ᥘᥝᥲ၊ ᥞᥬᥲ ᥛᥥ ᥘᥨᥝᥰ ᥑᥝᥴ ᥞᥧᥒᥴ ᥘᥝᥲ၊ ᥙᥩᥒᥰ ᥐᥢ ᥞᥥᥖᥱ ᥐᥣᥳ။ᥐᥩᥙ ᥙᥫ ᥖᥪᥰ ᥙᥦᥒᥱ ᥕᥣᥱ ᥖᥭᥰ ᥛᥫ ᥓᥝᥳ ᥘᥢᥳ ᥛᥣᥰ ᥞᥧᥒᥴ ᥘᥝᥲ၊ ᥘᥝᥲ ᥑᥝᥲ ᥑᥝᥴ ᥐᥦᥢᥱ ᥞᥩᥛᥴ ᥐᥦᥢᥱ ᥝᥣᥢᥴ ᥘᥨᥒᥴ ᥘᥣᥒᥴ၊ ᥑᥣᥭᥴ ᥘᥤ ᥑᥣᥭᥴ ᥑᥣᥖᥱ၊ ᥞᥧᥒᥴ ᥙᥨᥝᥰ ᥟᥛᥱ ᥗᥣᥖᥱ။

ᥐᥩᥙ ᥙᥫ ᥟᥣᥭᥲ ᥓᥤᥒᥱ、ᥘᥨᥢᥰ ᥕᥥᥢᥱ ᥔᥩᥒᥴ ᥙᥧᥱ ᥕᥣ ᥑᥐᥴ ᥐᥭᥳ ᥓᥩᥢᥰ ᥓᥣᥰ၊ ᥕᥣᥙᥱ ᥜᥧᥖᥴ ᥓᥣᥛᥱ ᥙᥩᥒ၊ ᥗᥢᥱ ᥞᥬᥲ ᥘᥩᥒ ᥑᥣᥴ ᥔᥨᥝᥴ ᥑᥣᥴ ᥒᥫᥢᥰ ᥙᥥᥢ ᥚᥧᥰ ᥘᥨᥒᥴ ᥘᥣᥒᥴ၊ ᥘᥣᥲ ᥞᥫᥢᥰ ᥖᥣ ᥕᥥᥰ ᥐᥩᥲ ᥘᥭᥲ ᥛᥣᥐ ᥛᥤᥰ ᥘᥤ ᥖᥥᥛ ᥛᥣᥰ၊ ᥐᥣᥭᥱ ᥘᥭᥲ ᥞᥣᥒᥲ ᥛᥬᥱ ᥞᥫᥢᥰ ᥔᥧᥒᥴ၊ ᥔᥪᥳ ᥘᥭᥲ ᥘᥦᥒᥴ ᥐᥣᥰ ᥛᥬᥱ၊ ᥐᥨᥢᥰ ᥖᥒᥰ ᥞᥫᥢᥰ ᥐᥩᥲ ᥘᥭᥲ ᥐᥨᥝᥱ ᥛᥫ ᥝᥢᥰ ᥓᥣᥛᥱ ᥓᥣᥰ ᥙᥥᥝᥱ ᥕᥣᥱ ᥔᥣᥱ ᥓᥬ ᥘᥢᥳ ᥕᥝᥳ။

ᥟᥣᥭᥲ ᥓᥤᥒᥱ ᥐᥩᥙ ᥙᥫ ᥐᥭᥳ ᥑᥣᥰ ᥓᥣᥰ、ᥞᥖᥴ ᥓᥣᥛᥰ ᥞᥖᥴ ᥙᥩᥒ、ᥙᥣᥢᥱ ᥙᥩᥒ ᥘᥩᥒ ᥖᥣᥒᥰ ᥘᥭᥲ ᥘᥩᥒ、ᥔᥪ ᥛᥣᥢᥱ၊ ᥓᥨᥝᥲ ᥟᥣ ᥛᥦᥰ ᥕᥨᥭᥰ ᥞᥥᥖᥱ ᥐᥨᥢᥰ ᥞᥨᥝᥴ ᥘᥬᥰ ᥛᥧᥱ ᥓᥧᥛᥰ ᥑᥫᥰ ᥖᥭᥰ ᥛᥫᥒᥰ ᥛᥣᥝᥰ ᥘᥨᥒᥴ။ᥞᥥᥖᥱ ᥐᥨᥢᥰ ᥞᥨᥝᥴ ᥞᥦᥴ၊ ᥘᥣᥲ ᥐᥣᥢ ᥐᥩᥲ ᥘᥛᥴ ᥛᥣᥰ ᥘᥨᥒᥴ ᥘᥣᥒᥴ၊ ᥘᥣᥲ ᥐᥣᥢ ᥖᥤ ᥞᥫᥢᥰ、ᥖᥣᥒᥰ ᥐᥣᥳ ᥖᥨᥝ ᥙᥣᥰ ᥙᥣᥱ ᥓᥨᥝᥲ ᥑᥩᥒ ᥘᥫᥒ၊ ᥕᥒ ᥘᥭᥲ ᥙᥨᥒ ᥓᥬ ᥐᥧᥴ ᥘᥣᥲ ᥞᥫᥢᥰ、ᥞᥥᥖᥱ ᥐᥣᥳ ᥑᥣᥭᥴ။ᥐᥩᥭᥰ ᥝᥣ၊ ᥛᥢᥰ ᥖᥨᥝ ᥕᥒ ᥑᥒᥰ ᥕᥒ ᥘᥥᥰ ᥔᥒᥴ၊ ᥘᥣᥲ ᥐᥣᥢ ᥘᥬᥰ ᥞᥫᥢᥰ ᥘᥬᥰ ᥘᥧᥛᥰ ᥖᥨᥝ ᥕᥒ ᥙᥩᥭᥱ ᥙᥦᥖ ᥔᥤᥴ ᥙᥫᥒ။ᥙᥤ ᥘᥭᥳ၊ ᥛᥢᥰ ᥟᥩᥢ ᥙᥣᥰ ᥛᥧᥱ ᥓᥧᥛᥰ ᥑᥫᥰ ᥖᥭᥰ ᥛᥫᥒᥰ ᥛᥣᥝᥰ ᥘᥨᥒᥴ ᥙᥩᥒ ᥞᥥᥖᥱ ᥐᥣᥢ ᥝᥤᥳ ᥓᥣᥱ ᥘᥩᥢᥳ ᥘᥤᥐ ᥘᥛᥴ ᥘᥣᥭᥴ၊ ᥕᥧᥱ ᥛᥣᥢᥲ ᥔᥨᥢᥴ ᥖᥭᥰ ᥖᥒᥰ ᥝᥥᥒᥰ 125 ᥛᥣᥢᥲ ᥖᥒᥲ ᥙᥣᥒ ᥔᥩᥢᥴ ᥘᥤᥐ ᥘᥣᥭᥰ ᥙᥦᥒᥱ ᥕᥣᥱ、ᥟᥣ ᥘᥥᥳ ᥗᥧᥒᥰ ᥓᥣᥛᥱ ᥖᥭᥰ။ᥕᥣᥛᥰ ᥘᥭᥳ၊ ᥐᥣᥢ ᥔᥩᥢᥴ ᥘᥤᥐ ᥘᥣᥭᥰ ᥙᥦᥒᥱ ᥕᥣᥱ ᥖᥫᥐ ᥞᥥᥖᥱ ᥝᥭᥳ ᥕᥬᥰ ᥕᥬᥰ။