ᥔᥣ ᥖᥣᥒᥰ ᥑᥩᥖᥱ ᥜᥢᥲ ᥟᥪᥒᥱ ᥖᥬᥲ ᥑᥨᥒᥰ
《ᥔᥣ ᥖᥣᥒᥰ ᥑᥩᥖᥱ ᥜᥢᥲ ᥟᥪᥒᥱ ᥖᥬᥲ ᥑᥨᥒᥰ》（saa täang xǒat fàn ʼǔeng tàue xöng, ᥑᥣᥛᥰ ᥑᥥᥱ : 德宏團結報）
ᥛᥫ ᥘᥐᥴ ᥘᥤᥲ ᥖᥤ ᥙᥣᥱ 1954 ᥙᥤ ᥘᥢᥳ,ᥓᥨᥒ ᥐᥨᥒᥱ ᥕᥤᥢᥳ ᥘᥣᥢᥳ ᥔᥫᥢᥰ ᥝᥨᥭᥰ ᥙᥛᥲ ᥓᥬ ᥖᥤᥴ ᥕᥧᥱ ᥑᥩᥙᥱ ᥘᥦᥢ ᥙᥦᥢ ᥖᥫᥒᥰ ᥟᥪᥒᥱ ᥖᥬᥲ ᥑᥨᥒᥰ ᥞᥨᥛ ᥐᥢ ᥟᥩᥐᥱ ᥗᥣᥒᥱ ᥔᥣ ᥖᥣᥒᥰ ᥘᥣᥭᥰ ᥑᥥᥱ ᥘᥣᥭᥰ ᥟᥣ ᥛᥥᥝᥰ ᥘᥢᥳ。ᥘᥐᥴ ᥘᥤᥲ ᥖᥤ ᥙᥣᥱ 1955 ᥙᥤ ᥘᥫᥢ ᥘᥫᥒ ᥘᥭᥲ ᥝᥢᥰ ᥘᥫᥒ,《ᥔᥣ ᥖᥣᥒᥰ ᥑᥩᥖᥱ ᥜᥢᥲ》（團結報） ᥖᥥᥰ ᥟᥩᥐᥱ ᥗᥣᥒᥱ ᥕᥝᥳ。ᥟᥣ ᥛᥦᥰ ᥑᥩᥙᥱ ᥘᥦᥢ ᥙᥦᥢ ᥖᥫᥒᥰ ᥛᥤᥰ ᥚᥧᥢᥴ ᥘᥣᥭᥰ ᥙᥪᥴ ᥓᥝᥲ ᥕᥝᥳ。
ᥓᥩᥛᥰ ᥘᥭᥲ ᥐᥣᥙ ᥛᥣᥢᥲ ᥐᥥᥒᥰ ᥛᥫᥒᥰ ᥘᥤ ᥛᥣᥰ ᥕᥬᥰ ᥕᥬᥰ,ᥛᥫ 1985 ᥙᥤ ᥘᥢᥳ ᥔᥛᥳ ᥟᥩᥐᥱ ᥗᥣᥒᥱ ᥘᥣᥭᥰ ᥑᥣᥒᥴ ᥟᥩᥢᥱ ᥗᥦᥢᥲ。ᥛᥫ 1988 ᥙᥤ,《ᥔᥣ ᥖᥣᥒᥰ ᥑᥩᥖᥱ ᥜᥢᥲ》 ᥘᥣᥭ ᥓᥪ ᥔᥥᥒᥴ ᥞᥩᥒᥳ ᥝᥣ 《ᥔᥣ ᥖᥣᥒᥰ ᥑᥩᥖᥱ ᥜᥢᥲ ᥟᥪᥒᥱ ᥖᥬᥲ ᥑᥨᥒᥰ》（德宏團結報）。
ᥛᥫ 1998 ᥙᥤ ᥘᥢᥳ, ᥙᥤ ᥘᥩᥒᥳ ᥖᥤᥢᥱ ᥕᥥᥛᥲ ᥚᥧᥢᥴ ᥑᥣᥝᥱ ᥔᥣ ᥖᥣᥒᥰ ᥘᥣᥭᥰ ᥑᥥᥱ ᥑᥪᥖ ᥛᥧᥢᥱ ᥘᥫᥒ ᥑᥪᥢᥲ ᥘᥫᥴ,ᥖᥒᥰ ᥘᥨᥒᥴ ᥛᥤᥰ ᥛᥧᥢᥱ ᥘᥫᥒ 4000 ᥜᥧᥢᥱ。
ᥛᥫ 1999 ᥙᥤ ᥘᥫᥢ ᥘᥫᥒ ᥘᥭᥲ ᥝᥢᥰ ᥘᥫᥒ ᥖᥥᥰ, ᥚᥧᥢᥴ ᥑᥣᥝᥱ ᥔᥣ ᥖᥣᥒᥰ ᥘᥣᥭᥰ ᥑᥥᥱ ᥝᥢᥰ ᥘᥫᥲ ᥛᥩᥭ ᥐᥩᥲ ᥟᥩᥐᥱ ᥗᥣᥒᥱ ᥗᥦᥢᥲ ᥙᥣᥖ ᥘᥫᥒ。ᥔᥣ ᥖᥣᥒᥰ ᥘᥣᥭᥰ ᥑᥥᥱ、 ᥘᥣᥭᥰ ᥖᥭᥰ ᥘᥫᥴ、 ᥘᥣᥭᥰ ᥑᥣᥒᥴ ᥘᥨᥒᥴ ᥑᥣᥒᥴ ᥟᥩᥢᥱ、 ᥘᥣᥭᥰ ᥘᥤᥲ ᥔᥨᥝᥲ ᥓᥫᥰ ᥘᥭᥳ 5 ᥛᥥᥝᥰ ᥖᥥᥰ ᥖᥪᥰ ᥓᥣᥐ ᥛᥣᥰ ᥚᥣᥭᥳ ᥘᥣᥭᥰ ᥕᥤᥢᥱ ᥘᥣᥭᥰ。
ᥛᥫ 2008 ᥙᥤ ᥘᥫᥢ 8,ᥓᥫᥝ ᥝᥨᥭᥰ、 ᥓᥫᥝ ᥓᥫᥢᥱ ᥜᥧᥰ ᥟᥝ ᥟᥩᥒᥲ ᥐᥣᥢ 6 ᥞᥫᥢᥰ ᥘᥧᥛᥰ ᥐᥢ ᥛᥣᥰ ᥙᥩᥒ ᥞᥥᥖᥱ ᥐᥣᥢ ᥑᥩᥒᥴ,ᥞᥩᥒᥳ ᥓᥪ ᥝᥣ ᥖᥬᥲ ᥑᥨᥒᥰ ᥔᥩᥢᥳ ᥛᥫᥢᥳ ᥓᥤᥲ ᥗᥩᥢᥳ, ᥟᥩᥒᥲ ᥐᥣᥢ 6 ᥞᥫᥢᥰ ᥘᥭᥳ ᥞᥨᥛ ᥐᥢ ᥞᥥᥖᥱ ᥔᥣ ᥖᥣᥒᥰ、 ᥐᥩᥒᥰ ᥙᥨᥝᥲ、 ᥗᥣᥖ ᥚᥧᥒᥱ、 ᥝᥣᥒᥰ ᥓᥣᥢᥱ、ᥟᥩᥐᥱ ᥙᥙ ᥘᥣᥭᥰ、ᥙᥤᥢᥲ ᥙᥦᥢᥱ ᥞᥣᥒ ᥔᥥᥒᥴ ᥗᥣᥖ ᥚᥧᥒᥱ ᥟᥣ ᥛᥥᥝᥰ ᥓᥫᥰ ᥘᥭᥳ。
ᥛᥫ 2014 ᥙᥤ ᥘᥫᥢ 3 ᥘᥭᥲ 29 ᥝᥢᥰ,《ᥔᥣ ᥖᥣᥒᥰ ᥑᥩᥖᥱ ᥜᥢᥲ ᥟᥪᥒᥱ ᥖᥬᥲ ᥑᥨᥒᥰ》 ᥘᥤ ᥔᥤᥢ ᥔᥤ ᥔᥛᥳ ᥟᥩᥐᥱ ᥗᥣᥒᥱ ᥘᥣᥭᥰ ᥛᥣᥢ ᥗᥦᥢᥲ ᥕᥣᥒᥱ ᥘᥫᥒ。ᥛᥫ 2015 ᥙᥤ ᥘᥫᥢ 12 ᥘᥢᥳ ᥖᥥᥰ ᥟᥩᥐᥱ ᥗᥣᥒᥱ ᥚᥧᥢᥴ ᥑᥣᥝᥱ ᥔᥣ ᥖᥣᥒᥰ ᥘᥣᥭᥰ ᥛᥣᥢ ᥟᥢ ᥓᥪ ᥛᥢᥰ ᥞᥩᥒᥳ ᥝᥣ 《ᥙᥝ ᥙᥨᥝ》（胞波） ᥘᥢᥳ, ᥕᥧᥱ ᥘᥬᥰ ᥖᥫᥒᥰ ᥞᥝᥰ ᥙᥥᥢ ᥔᥣ ᥖᥣᥒᥰ ᥛᥤᥰ ᥘᥣᥐ ᥛᥣᥖ ᥟᥩᥐᥱ ᥔᥣ ᥖᥣᥒᥰ ᥘᥣᥭᥰ ᥛᥣᥢ ᥘᥥᥝ ᥘᥥᥝ ᥘᥢᥳ ᥚᥧᥢᥴ ᥘᥫᥒ ᥞᥝᥳ。
ᥛᥫ 2022 ᥙᥤ ᥘᥫᥢ 4 ,ᥓᥨᥒ ᥕᥣᥒ ᥔᥦᥢ ᥔᥩᥢᥳ ᥙᥧᥱ、ᥔᥣᥭᥳ ᥓᥫᥢᥱ ᥙᥧᥱ、ᥟᥩᥒᥲ ᥙᥩᥒ ᥐᥣᥢ ᥑᥣᥝᥱ ᥛᥬᥱ ᥟᥩᥐᥱ ᥗᥣᥒᥱ ᥘᥣᥭᥰ ᥐᥩᥒᥰ ᥙᥨᥝᥲ ᥗᥣᥖ ᥚᥧᥒᥱ ᥘᥬᥰ ᥖᥫᥒᥰ ᥐᥣᥰ ᥔᥣᥛᥴ ᥟᥩᥒᥲ ᥘᥭᥳ ᥟᥝ ᥟᥩᥒᥲ ᥟᥩᥐᥱ ᥑᥣᥝᥱ ᥛᥬᥱ ᥟᥪᥒᥱ ᥖᥬᥲ ᥑᥨᥒᥰ ᥖᥤᥢᥱ ᥙᥥᥢ ᥟᥩᥒᥲ ᥕᥧᥱ ᥜᥣᥭᥱ ᥟᥩᥐᥱ ᥑᥣᥝᥱ ᥛᥬᥱ ᥖᥒᥰ ᥖᥫᥒᥰ 60 ᥟᥪᥒᥱ ᥖᥤ ᥔᥥᥒᥳ ᥓᥣᥛᥰ ᥞᥥᥖᥱ ᥕᥥᥛᥲ ᥘᥢᥳ ᥞᥫᥢᥰ ᥘᥫᥒ。
ᥛᥫ 2023 ᥙᥤ ᥘᥫᥢ 4 ᥘᥭᥲ 20 ᥝᥢᥰ,ᥖᥬᥲ ᥑᥨᥒᥰ ᥔᥩᥢᥳ ᥛᥫᥭᥳ ᥓᥤᥲ ᥗᥩᥢᥳ ᥔᥛᥳ ᥘᥣᥭ ᥓᥪ ᥝᥣ ᥖᥬᥲ ᥑᥨᥒᥰ ᥓᥫᥝ ᥕᥨᥒᥳ ᥛᥫᥭᥳ ᥗᥤᥰ ᥓᥨᥒ ᥔᥤᥢ, ᥖᥬᥲ ᥑᥨᥒᥰ ᥕᥨᥒᥳ ᥛᥫᥭᥳ ᥗᥤᥰ ᥓᥨᥒ ᥔᥤᥢ ᥘᥤᥖ ᥘᥣᥭ ᥐᥣᥭᥰ ᥛᥥᥰ ᥗᥝᥴ ᥙᥦᥒ ᥔᥥᥴ ᥙᥨᥝᥰ ᥙᥭ ᥟᥩᥐᥱ ᥑᥨᥢᥴ ᥖᥣᥒᥰ ᥟᥢ ᥛᥤᥰ ᥞᥣᥒ ᥙᥫᥒ ᥙᥪᥴ ᥓᥝᥲ ᥛᥣᥰ ᥕᥝᥳ。ᥘᥣᥭᥴ ᥙᥤ ᥛᥣᥰ, ᥕᥧᥱ ᥖᥤ ᥓᥫᥝ ᥝᥨᥭᥰ、 ᥓᥫᥝ ᥓᥫᥢᥱ ᥜᥧᥰ ᥟᥩᥢ ᥞᥨᥝᥴ ᥙᥣᥰ ᥛᥦᥐᥱ ᥘᥭᥳ,ᥕᥧᥱ ᥖᥤ ᥓᥫᥝ ᥝᥨᥭᥰ ᥔᥦᥢ ᥔᥩᥢᥳ ᥙᥧᥱ ᥓᥤᥳ ᥟᥩᥐᥱ ᥛᥩᥐᥱ ᥘᥥᥴ ᥘᥭᥳ, ᥕᥧᥱ ᥖᥤ ᥖᥬᥲ ᥑᥨᥒᥰ ᥓᥫᥝ ᥕᥨᥒᥳ ᥛᥫᥭᥳ ᥗᥤᥰ ᥓᥨᥒ ᥔᥤᥢ ᥕᥣᥙᥱ ᥜᥧᥒᥴ ᥖᥫᥐᥱ ᥓᥣᥛᥱ ᥔᥥᥴ, 《ᥔᥣ ᥖᥣᥒᥰ ᥑᥩᥖᥱ ᥜᥢᥲ ᥟᥪᥒᥱ ᥖᥬᥲ ᥑᥨᥒᥰ》ᥙᥨᥝᥰ ᥘᥣᥭ ᥞᥣᥒ ᥛᥬᥱ ᥕᥝᥳ,ᥘᥣᥲ ᥐᥣᥢ ᥐᥧ ᥙᥣᥲ ᥐᥧ ᥜᥣᥭᥱ ᥗᥢᥱ ᥞᥥᥖᥱ ᥑᥪᥢᥲ ᥞᥩᥛᥴ ᥞᥢᥴ ᥕᥬᥰ ᥕᥬᥰ。ᥘᥩᥒ ᥔᥩᥢᥳ ᥛᥩᥐᥱ ᥑᥣᥝᥱ ᥛᥬᥱ ᥛᥤᥰ ᥛᥣᥱ ᥛᥤᥰ ᥞᥦᥒᥰ。
ᥔᥣ ᥖᥣᥒᥰ ᥖᥒᥰ ᥘᥩᥒ ᥟᥩᥐᥱ ᥑᥣᥝᥱ ᥛᥬᥱ ᥝᥣᥒᥰ ᥘᥨᥝᥲ ᥐᥫᥐᥱ ᥞᥩᥛᥰ ᥐᥢ ᥛᥣᥰ ᥙᥩᥒ ᥞᥥᥖᥱ。《ᥔᥣ ᥖᥣᥒᥰ ᥑᥩᥖᥱ ᥜᥢᥲ ᥟᥪᥒᥱ ᥖᥬᥲ ᥑᥨᥒᥰ》ᥕᥧᥱ ᥘᥬᥰ ᥝᥣᥒᥰ ᥘᥨᥝᥲ ᥘᥢᥳ ᥙᥩᥒ ᥞᥥᥖᥱ ᥐᥣᥢ ᥑᥩᥒᥴ ᥟᥢ ᥝᥣ 「ᥑᥣᥝᥱ ᥛᥬᥱ ᥖᥬᥲ ᥑᥨᥒᥰ」（德宏融媒）、「ᥑᥢᥴ ᥓᥥᥝᥰ ᥞᥧᥳ ᥘᥭᥲ ᥑᥣᥝᥱ ᥛᥬᥱ」（新聞快報）ᥓᥫᥰ ᥘᥭᥳ ᥔᥥᥴ,ᥘᥣᥱ ᥛᥥᥱ ᥓᥪ ᥔᥥᥒᥴ ᥑᥦᥢᥰ ᥞᥨᥒᥴ ᥗᥦᥢᥲ ᥞᥝᥳ,ᥐᥨᥢᥰ ᥕᥥᥛᥲ ᥐᥨᥢᥰ ᥖᥨᥭᥰ ᥛᥤᥰ ᥙᥥᥢ 450 ᥛᥧᥢᥱ ᥐᥨᥝᥳ。ᥙᥤ ᥘᥭᥳ ᥑᥣᥝᥱ ᥛᥬᥱ ᥓᥫᥰ ᥙᥩᥭᥱ ᥟᥩᥐᥱ ᥐᥣᥱ ᥘᥢᥳ ᥙᥫᥢ ᥕᥥᥛᥲ ᥘᥛᥴ ᥙᥨᥢᥳ 4 ᥐᥧᥐ ᥖᥥᥱ ᥙᥩᥐ。ᥙᥤ ᥘᥩᥒᥳ ᥐᥥᥐ ᥕᥥᥛᥲ ᥑᥣᥝᥱ ᥛᥬᥱ ᥟᥩᥒᥲ ᥐᥣᥢ ᥖᥬᥲ ᥑᥨᥒᥰ ᥕᥨᥒᥳ ᥛᥫᥭᥳ ᥗᥤᥰ ᥓᥨᥒ ᥔᥤᥢ ᥘᥢᥳ ᥛᥤᥰ ᥙᥥᥢ 1300 ᥛᥧᥢᥱ ᥐᥨᥝᥳ,ᥑᥣᥝᥱ ᥛᥬᥱ ᥓᥫᥰ ᥙᥩᥭᥱ ᥟᥩᥐᥱ ᥐᥣᥱ ᥘᥢᥳ ᥐᥨᥢᥰ ᥐᥥᥐ ᥕᥥᥛᥲ ᥑᥪᥖ ᥗᥪᥒᥴ 35 ᥐᥧᥐ ᥖᥥᥱ ᥐᥨᥝᥳ ᥙᥩᥐ。
ᥘᥩᥒ ᥔᥩᥢᥳ ᥛᥩᥐᥱ ᥑᥣᥝᥱ ᥛᥬᥱ ᥟᥣ ᥛᥥᥝᥰ ᥘᥤ ᥘᥣᥲ ᥘᥤ ᥞᥥᥖᥱ ᥘᥭᥲ ᥑᥦᥛᥳ ᥛᥣᥰ。ᥝᥭᥳ ᥔᥤᥴ ᥟᥝ ᥔᥣ ᥖᥣᥒᥰ ᥘᥣᥭᥰ ᥖᥭᥰ、 ᥘᥣᥭᥰ ᥑᥣᥒᥴ ᥘᥨᥒᥴ ᥑᥣᥒᥴ ᥟᥩᥢᥱ、 ᥘᥣᥭᥰ ᥘᥤᥲ ᥔᥨᥝᥰ ᥞᥥᥖᥱ ᥘᥤ ᥙᥩᥒ ᥒᥣᥛᥰ ᥔᥥᥴ,ᥓᥧᥛᥰ ᥖᥭᥰ、ᥓᥧᥛᥰ ᥑᥣᥒᥴ ᥘᥨᥒᥴ ᥑᥣᥒᥴ ᥟᥩᥢᥱ、 ᥓᥧᥛᥰ ᥘᥤᥲ ᥔᥨᥝᥰ ᥔᥛᥳ ᥝᥭᥳ ᥓᥬ ᥛᥣᥰ ᥞᥥᥖᥱ ᥝᥨᥭ ᥔᥤᥢᥱ ᥐᥨᥒ ᥓᥨᥒᥱ ᥑᥝᥱ ᥓᥫᥰ ᥘᥭᥳ,ᥑᥣᥝᥱ ᥛᥬᥱ ᥓᥫᥰ ᥙᥩᥭᥱ ᥟᥩᥐᥱ ᥐᥣᥱ ᥘᥢᥳ ᥙᥤ ᥘᥩᥒᥳ ᥐᥥᥐ ᥕᥥᥛᥲ ᥑᥪᥖ ᥗᥪᥒᥴ 2000 ᥛᥧᥢᥱ ᥐᥨᥝᥳ ᥙᥩᥐ。
ᥚᥧᥢᥴ ᥘᥣᥭᥰ ᥘᥭᥲ ᥔᥣᥒᥰ ᥔᥧᥰ ᥘᥛᥴ ᥖᥥᥳ ᥖᥥᥳ。ᥓᥨᥝ ᥘᥬᥰ 10 ᥙᥤ ᥘᥭᥳ,ᥚᥧᥢᥴ ᥑᥣᥝᥱ ᥘᥣᥭᥰ ᥑᥥᥱ、 ᥘᥣᥭᥰ ᥖᥭᥰ、 ᥘᥣᥭᥰ ᥑᥣᥒᥴ ᥘᥨᥒᥴ ᥑᥣᥒᥴ ᥟᥩᥢᥱ、 ᥘᥣᥭᥰ ᥘᥤᥲ ᥔᥨᥝᥰ ᥟᥢ ᥟᥝ ᥐᥣᥱ ᥘᥬᥰ ᥖᥫᥒᥰ ᥐᥣᥰ、ᥘᥬᥰ ᥔᥫᥢᥰ ᥚᥤᥢᥳ ᥕᥨᥭᥰ ᥚᥬᥴ ᥖᥦᥛᥲ ᥘᥭᥲ ᥘᥤ、ᥔᥛᥳ ᥛᥤᥰ ᥟᥣ ᥖᥤᥐ ᥙᥥᥱ ᥟᥢ ᥘᥭᥲ ᥗᥪᥒᥴ ᥘᥬᥰ ᥖᥫᥒᥰ ᥐᥣᥰ、 ᥘᥬᥰ ᥔᥫᥢᥰ ᥔᥣᥒᥰ ᥔᥧᥰ ᥘᥢᥳ ᥛᥤᥰ 1300 ᥙᥣᥭ ᥚᥧᥢᥴ。ᥚᥧᥢᥴ ᥘᥣᥭᥰ《ᥔᥣ ᥖᥣᥒᥰ ᥑᥩᥖᥱ ᥜᥢᥲ ᥟᥪᥒᥱ ᥖᥬᥲ ᥑᥨᥒᥰ》 ᥓᥣᥛᥱ ᥘᥭᥲ ᥘᥣᥱ ᥛᥥᥱ ᥞᥨᥒᥴ ᥞᥣᥒᥰ ᥟᥢ ᥘᥬᥰ ᥖᥫᥒᥰ ᥔᥣᥒᥰ ᥔᥧᥰ ᥘᥢᥳ ᥔᥣᥛᥴ ᥙᥩᥐ,ᥙᥥᥢ ᥟᥩᥒᥲ ᥟᥩᥐᥱ ᥑᥣᥝᥱ ᥛᥬᥱ ᥑᥐ ᥘᥬᥰ ᥓᥫᥝ ᥛᥫᥒᥰ ᥕᥤᥢᥳ ᥘᥣᥢᥳ ᥟᥢ ᥓᥣᥛᥱ ᥘᥭᥲ ᥘᥣᥱ ᥛᥥᥱ ᥘᥛᥴ ᥔᥤᥴ ᥙᥫᥢ ᥘᥢᥳ,ᥐᥩᥲ ᥙᥥᥢ ᥟᥪᥒᥱ ᥖᥬᥲ ᥑᥨᥒᥰ ᥛᥫ ᥟᥩᥢ ᥖᥣᥒᥰ ᥟᥛᥱ ᥛᥤᥰ ᥐᥨᥝᥱ ᥘᥢᥳ。